30

کاتێ ئه‌سپی ته‌مه‌ن به‌زینکراوی چوارناڵ‌و بێ ڕاوه‌ستان به‌ره‌و پێش ده‌ڕوات، به‌بێ گوێدانه‌ ئه‌وه‌ی تۆ چیت‌و چت ده‌وێ، له‌کوێ ڕاوه‌ستاویت‌و ده‌بێ که‌نگێ‌و چۆن پشوو بده‌یت، به‌ره‌و پێش ده‌چێت‌و ناسره‌وێ.
که‌وایه‌، ئه‌بێ شادو سه‌وز، زیندوو هیوادار بژین‌و زۆر کۆڵ به‌م دونیاوه‌ هه‌ڵنه‌گرین که‌ ته‌نانه‌ت ناتوانین یه‌ک چرکه‌ سات ئه‌سپی ته‌مه‌ن له‌غاو بکه‌ین، ئه‌گه‌ر شانسی گه‌یشتن به‌و قوناغه‌ هه‌بێ، ته‌مه‌ن ده‌ڕوات‌و ده‌سته‌کان ڕۆژیک ده‌له‌رزن، ئه‌بێ ئه‌ونده‌ بیره‌وه‌ری له‌ جانتای ئه‌م سه‌فه‌ره‌دا بمێنێته‌وه‌ که‌ له‌به‌رده‌م ئاوینه‌دا بزه‌ بڕژێنێته‌ روخسارمانه‌وه‌.

پێم ده‌ڵێن، یه‌که‌مین حه‌وتووی مانگی پووشپه‌ڕی ساڵی 57ی هه‌تاوی، به‌رانبه‌ر به‌ 78ی زایینی، چاوم به‌ ژیان هه‌ڵیناوه‌.ئه‌مڕۆ، سێی پووشپه‌ڕ، به‌رانبه‌ر به‌ 24ی ژوئه‌ن، کاتێ له‌ نێو پتر له‌ 5 میلیارد مرۆڤی گۆی زه‌ویدا، ته‌نیا که‌سێک، گرینگ نیه‌، دوور یان نزیک، به‌بیرت دێنێته‌وه‌ 30 ساڵ به‌ر له‌ئێستا تۆ له‌ گوندێکی وڵاتیکی دوور، چاوت به‌ژیان هه‌ڵێناوه‌، له‌وێ ئاشنا به‌ ده‌نگی ڕووبارو بۆنی به‌هار بوویت‌، ره‌نگی سروشت‌و باغه‌ جۆراوجۆره‌کانی بۆ هه‌میشه‌ له‌ نیگاتدا قه‌تیس ماوه‌ته‌وه‌، شادی هه‌موو گیانت داده‌گرێت‌و سه‌رتاپای رۆژه‌که‌ت به‌بێ ئه‌وه‌ی که‌س له‌ هاوکاره‌کانت بزانن بۆ ئاوا شادیت‌و بسکه‌ی سمێڵت دێت، تێپه‌ڕ ده‌بێ.ده‌وروبه‌رت له‌گه‌ڵ هه‌موو نزیکیان، لێت دوورن، وه‌کوو زۆربه‌ی کاته‌کان...

لێره‌، له‌ شاری پاریس، هه‌تاوی به‌تین‌وتاوی ئه‌م سه‌ره‌تای وه‌رزی هاوینه‌، باڵای به‌سه‌ر شان‌و پیلی شاردا شۆڕکردۆته‌وه‌، شاریش وه‌کوو پرچی خاوێن‌و ئاڵتونی کچانی به‌عیشوه‌وو ناز، وێرای کوڕانی کراوه‌و ئه‌وینداری ژیان، به‌له‌شی ڕووت‌و نیوه‌ پۆشته‌وه‌، جه‌سته‌ی ناسکیان داوه‌ته‌ ده‌م هه‌تاوی چۆمی "سێن"‌، بۆ ئه‌وه‌ی نه‌رم نه‌رم بیگه‌زێ، من له‌گه‌ڵ "عه‌زیز"، به‌سواری "ماتۆر"، به‌شێکی زۆر له‌ که‌لێن‌و قوژبنه‌کانی شار ده‌پشکنین‌و بزه‌ له کۆڵان‌و شه‌قامه‌کان‌و رووخساری ئه‌م شاره‌دا به‌جێدێڵین.

له‌ چێشتخانه‌یه‌کی شه‌قامی به‌ناوبانگی شانزالیزه‌ (Champs-Elysées)، ده‌فره‌کانمان سارێژ ده‌که‌ین له‌ "شامپاین‌"، پاشان به‌ شه‌رابی سوور لێوه‌کانمان ده‌خوسێنین.چ شه‌وێکی ئه‌فسووناوییه‌، من‌و هاوڕێکه‌م، له‌گه‌ڵ بنه‌ماڵه‌یه‌کی فه‌رانسه‌وی کۆنه‌ ئاشنای، شه‌وێک به‌سه‌رخۆشی‌و به‌خۆشی تێپه‌ڕ ده‌که‌ین، نهۆمی سه‌روو ماڵی ئه‌و خاتوونه‌ی هاورێی هاورێکه‌م، کۆمه‌ڵێک گه‌نجی لێکۆبۆته‌وه‌و هه‌موویان پێکه‌وه‌ سه‌مایانه‌و ده‌نۆشن‌.

ساڵرۆژی له‌ دایک بوونی کوردێک، ئه‌بێته‌ هۆکارێ چه‌پڵه‌ لێدانی ئه‌وان له‌ نهۆمی بان ئێمه‌وه‌، ئه‌مه‌ش دڵی خانه‌ خوێ نه‌رم ده‌کات بۆ ئه‌وه‌ی قاپێک "ڤودکا"یان به‌ رووخۆشییه‌وه‌ پێببه‌خشی‌و هه‌مووان پێکه‌وه‌ بڵین:" happy birth day ".

هه‌موو ئه‌م ڕووداوانه‌، منیان به‌خۆیان‌و شاری پاریسه‌وه‌، گرێنه‌داوه‌ته‌وه‌، کڵافه‌ی ئاڵۆزی بیره‌کانم له‌ شوێنێکی دیکه‌‌یه‌، له‌ دووری دووره‌.

ئێستا بیر ده‌که‌مه‌وه‌، رۆژی 22ی مانگی بانه‌مه‌ڕی ساڵی 1375، به‌رانبه‌ر به‌ 96، بۆ یه‌که‌مین جار گه‌یشتمه‌ بنکه‌کانی پێشمه‌رگه‌، 4ی مانگی 8ی 2000، له‌ پیره‌ "هه‌ولێر"ه‌وه‌ به‌ره‌و شاری "وان" له‌ تورکیه‌ به‌رێکه‌وتین‌و 14ی مانگی 6ی ساڵی 2002، له‌ سوئێد گیرساینه‌وه‌.

سه‌ره‌تاکانی ساڵی 2006، له‌ پاریس بارگه‌و بنه‌م خست‌، ئێستا بیر له‌ ژیان له‌وپه‌ڕی دونیا ده‌که‌مه‌وه، به‌وردی‌و له‌سه‌ره‌خۆ، گرێچنی ژیان له‌وێ بۆخۆم ساکارو ساده‌ ده‌که‌مه‌وه‌. ئیدی ئێره‌ جێگای من نیه‌، له‌مێژه‌ ئه‌مه‌ ده‌زانم‌، به‌ڵام فێڵ له‌ خۆم ده‌که‌م، هیج باش نابێ، ئاو ناچێته‌وه‌ ئاوه‌ڕۆ!

مۆمه‌ داگیرساوه‌کان، گوڵێکی سوور، قاپێک "شامپاین"، چه‌ند جۆر له‌و خواردنه‌وانه‌ی سه‌رت گه‌رم دادێنن، له‌گه‌ڵ هه‌موو مێهره‌بانی‌یه‌کانی خزم‌و باوکی هاورێی هاورێکه‌م، ناتوانن دڵم لێره‌ بحه‌وێنه‌وه‌.

به‌ڵام به‌ خۆم ئێژم، پیرۆزه‌، درگای 30 ساڵی ته‌مه‌ن به‌ ئارامی‌و ڕووخۆشی بکه‌ره‌وه‌، بیری سه‌فه‌ری رێگا دووره‌کان له‌ وجو‌ددا مه‌کوژه‌.

له‌م رێگا دوورو درێژانه‌دا، ئه‌گه‌ینه‌‌ یه‌ک‌و شه‌راب ده‌نۆشین، که‌سه‌که‌م وه‌کوو هه‌میشه‌ چاوه‌رێت ده‌که‌م!