Wednesday, March 30, 2022
Wednesday, March 23, 2022
یاسه‌مین زه‌كی ئه‌مین: كوردستان24 كارێكی گه‌وره ده‌كات رووماڵی راستییه‌كان ده‌كات
یاسه‌مین ئه‌مین زه‌كی، بازرگانی راوێژكار له ئه‌مه‌ریكا و كوردستان، كه ئێستا له رێگه‌ی كۆمپانیایه‌كی ئه‌مه‌ریكی له هه‌رێمی كوردستان كارده‌كات، پیرۆزبایی نه‌ورۆز له گه‌لی كورد ده‌كات.
یاسه‌مین له لێدوانێكدا بۆ كوردستان24، گوتی: من یاسەمین ئەمین زەكیم، بازرگانی راوێژكارم لە ئەمه‌ریكا و كوردستان، ئێستا لە رێگەی كۆمپانیایەكی ئەمه‌ریكی لە كوردستان كار دەكەم، دەمەوێ سەرەتا پیرۆزبایی نەورۆز لە ھەموو لایەك بكەم.
گوتیشی: كوردەكان ھەڵپەڕكێ، كولتوور، خواردن و موسیقای جیاوازی خۆیان ھەیە، ھەموو ئەوانە لە كولتووری وڵاتانی دراوسێ جیاوازن، تایبەت بەخۆیانن. كوردەكان بەدوای ناسنامەو پاسپۆرتی خۆیاندا دەگەڕێن، بە دوای راستییەكان و پرۆفشناڵیەت لەرۆژنامەگەریدا دەگەڕێن، كوردەكان دەیانەوێ روخسارێكی جیاوازتر لەخۆیان نیشانی جیھان و دەورووبەریان بدەن. ھەربۆیە دیسان پیرۆزبایی نەورۆزیان لێدەكەم.
هه‌روه‌ها گوتی: ھاوكات دیموكراسی بەھایەكی گەورەو پیرۆزە، كوردستان24 كارێكی گەورە ده‌كات، رووماڵی راستییەكان دەكات، بەدوای راستییەكاندا دەگەڕێت، رۆژنامەنووسەكانی راستگۆو بوێرن، ھیوای خۆشی و بەردەوامیان بۆ دەخوازم.
Saturday, March 19, 2022
لە واشنتۆن ڕێوڕەسمی نەورۆز بەڕێوە چوو
ئێوارەی ڕۆژی هەینی ڕێکەوتی ٢٨ی ڕەشەمەی ١٤٠٠ی هەتاوی، کوردەکانی کوردستانی ڕۆژهەڵات لە دەڤەری "واشنتۆن" لە وڵاتی ئامریکا، لە
دەوری یەکتر کۆ بوونەوە و بەبۆنەی سەری ساڵی نوێ و نەورۆزی کوردەواری ڕێوڕەسمێکیان بەڕێوە برد.
سەرەتای ڕێوڕەسمەکە بە سروودی نەتەوەیی "ئەی ڕەقیب" و ڕاگرتنی ساتێک بێدەنگی بۆ ڕێزلێنان لە گیانی پاکی شەهیدانی کوردستان دەستی پێ کرد.
پاشان "سیامەند خوسرەوی" ڕیزبەندی بەڕێوەچوونی ڕێوڕەسمەکەی خوێندەوە و دواتر "ڕەحیم ڕەشیدی" چەند وتەیەکی سەبارەت بە نەورۆز پێشکەش بە بەشداربووان کرد.
"ڕەشیدی" وێڕای پیرۆزبایی نەورۆز، هاوکات پەڕژایە سەر مێژووی نەورۆز لە فەلسەفەی شۆڕشگێڕیدا و باسی لەوە کرد نەورۆز تەنیا هاتنی بەهار و بووژانەوەی سروشت نییە بەڵکوو نەورۆز هێمای بەرەنگاری دژی ستەم و بێدادییە، لەم ڕۆژەدا ئێمە بە باوەڕبەخۆبوونێکی پترەوە لە پێناوی ئازادیدا تێدەکۆشین.
"ڕەشیدی" لە بەشێکی دیکەی قسەکانیدا باسی لە گرینگیی کولتووری نەورۆزی جامانەکان کرد و بە بیری هەموو لایەکی هێنایەوە کە پیلانگێڕیی کۆماری ئیسلامی بۆ شێواندنی فەلسەفەی دژە ستەمی نەورۆز هەوڵێکی نەزۆکە و هیچکات لە کوردستان سەرکەوتوو نابێت.
لە درێژەدا "مەحبووبە حوسێنی" باسێکی لەسەر نەورۆز لە ئەدەبیاتی کوردیدا پێشکەش کرد.
هەروەها "خالید خورینجی" هۆنراوەیەکی نەورۆزی بۆ بەشداران خوێندەوە.
ڕێوڕەسمەکە بە شایی و ڕەشبەڵەکی کوردەواری کۆتایی پێ هات.
ئەندام و لایەنگرانی حیزبی دێموکرات وێڕای کوردستانییان، بە شێوەیەکی بەرچاو لەو ڕێوڕەسمەدا بەشدارییان کردبوو.
جۆ بایدن: سەرۆک پوتن تاوانباری جەنگە
رەحیم رەشیدی\ کوردستان ٢٤، واشنگتن
ڕۆژی چوارشەممە، سەرۆک جۆو بایدەن لە وتووێژێکی رۆژنامەوانیدا لە کۆشکی سپی، وتی پێی وایە سەرۆکی ڕووسیا ڤلادەمیر پوتین بە هۆی هێرشەکانییەوە بۆسە ئۆکراینا "تاوانباری جەنگە''.
لە کاتی هێرشەکانی رووسیا بۆسەر ئۆکراینا ئەمە یەکەمین جارە سەرۆکی ئەمریکا سەرۆکی رووسیا بە ''تاوانباری جەنگ " ناو ببات. بکات. ئەم هەڵوێستەی بایدەن لە کاتێکدایە کە حەوتووی ڕابردوو کاملا هێرس، جێگری سەرۆک بایدەن لە کاتی سەردانەکەیەدا بۆ پۆڵەندا بە دڵنیاییەوە باسی لەوە کردبوو دەبێ دەربارەی ئەگەری ئەنجامدانی تاوانی جەنگ، لێکۆڵینەوە لە رووسیا بکرێت.
جۆ بایدن، لە کاتی جێهێشتنی بۆنەیەکدا لە لایەن یەکێک لە رۆژنامەنووسەکان پریسیاری لێکرا کە ئایا پوتین "تاوانباری جەنگە"؟، سەرەتا بە نەخێر وڵامی دایەوە. لێ پاش کەمێک گەڕایەوە لای رۆژنامەنووسەکە پرسی: "تۆ پرسیاری کرد ئایا پوتین تاوانباری جەنگە؟، ئەگەر پرسیارەکەت ئەمە بێ، بەڵێ پێموایە ''پوتین تاوانباری جەنگە".
ئەم هەڵوێستەی بایدەن لە کاتێیدا کە ئەمریکا یارمەتییەکی سەربازی بە بڕی 1 میلیار دۆلار بۆ ئۆکراینا راگەیاند کە هاوکارییەکە سیستەمەکانی دژە تانک، دژە فرۆکە، رۆکێتهاوێژەی ستینگەرو جاڤێلینس لە خۆدەگرێت. ئەم یارمەتییە داراییە بەشێکە لەو هاوکارییەت کە ئەمریکا بە بڕی 13.6 میلیار دۆلار بۆ ئۆکراینای تەرخان کردوە. ئەم هاوکارییانەی ئەمریکا لە کاتێدایە کە هەمان رۆژ ڤۆلادەمیر زیلینسكی سه‌رۆكی ئۆكرانی لە ڕێگای ئۆنڵاینەوە وتارێکی پێشکەشی ئه‌ندامانی كۆنگرێسی ئەمریکا کردو وێرای سپاس لە هاوکارییەکانی واشنگتن، دیسان داوای ناوچه‌ی دژه‌فڕینی ئاسمانی وڵاته‌كه‌ی كرد، بەڵام ئەمریکا تاکوو ئێستا بەم دوایەی ئۆکراینا رازی نەبوە.
گرێدراوو بەم باسەوە، جێن ساکی وتەبێژی کۆشکی سپی ئاشکرای کرد، سەرۆک جۆو بایدن لە رێکەوتی 24ی ئەم مانگەدا، سەردانی ئووروپا دەکات و لەگەڵ هاوپەیمانە ئووروپاییەکان و ئەندامانی ناتۆ لە بێلاڕووس شەنوکەوی هێڕشەکانی رووسیا بۆسەر ئۆکراینا دەکەن.
ماوەی کەمتر لە مانگێکە کە پەلاماری ڕووسیا دژی ئۆکراینا دەستی پێکردووە، بە گوێرەی سەرچاوەکانی رێکخراوی نەتەوەیەکگرتووەکان، تاوەکو ئێستا پتر لە 3 میلیۆن ئاوارە بوون، هەروەها لە نێوخۆی ئۆکرایناش نزیک بە 2 میلیۆن نەفەر بێخانەولانە بوون و نزیک بە 600 کەسی مەدەنیش گیانیان لە دەست داوە.
Wednesday, March 16, 2022
Sunday, March 13, 2022
واشنگتن: کاردانەوە فەرمیی و مێدیاییەکانی هێرشە مووشەکییەکەی سەر ھەولێرو کوردستان24
دوای ئەوەی شەوی شەممە لەسەر یەکشەممە، هەولێرو دامەزراوەی کوردستان ٢٤ بە چەند مووشەکێک کرایە ئامانج، هەواڵدەری فۆکس نیوز لە زمان کاربەدەستێکی فەرمیی ئەمریکاوە ئاشکرای کردو، مووشەکەکان لە لایەن ئێرانەوە بەرەو کونسولخانەی ئەمریکا لە هەولێر هاوێژراون بەڵام هیچکامیان ئامانجیان نەپێکاوە.
ماڵپەری نیویۆرک پۆستی ئەمریکا، ڤیدیۆیەکی تویتەری کوردستان24ی داناوەو ئاماژە بە وەشانی راستەوخۆی ستۆدیۆی کوردستان24 دەدات کە بەهۆی بۆردومانەکەوە زیانی پێگەیشتووە.
کاربەدەستانی ئەمەریکا، لە وەزارەتی دەرەوە بە مەرجێک ناویان ئاشکرا نەکرێت بە هەواڵادەرییەکانی ڕۆیتەرزو ئاسۆشیتەدپرێسیان ڕاگەیاندوە ئەو هێرشانە هیچ زیانێکیان بە هێزەکانی ئەمەریکا نەگەیاندووە. بەڵام نەیانشاردۆتەوە کە موشەکە بالستیکەکان لە ئێرانەوە هاویژراون.
هەروەها هواڵدەری ''ئەی بی سی'' لە زمان کاربەدەستێکی فەرمیی ئەمریکاوە ئاشکرای کردوە کە موشەکەکان لە لایەن ئێرانەوە هاویژراون. هاوکات بڵاوکراوەی ''واڵ ستریت ژونراڵ'' بە پشت بەستن بە سەرچاوەیەکی فەرمیی ئەمریکا باسی لەوە کردوە یەکێک لەو دوو مووشەکانە، لە دوو کیلۆمیتری ناوچەی کونسولگەری ئەمریکا لە هەولێر دراوە. وەزارەتی دەرەوەی ئەمریکاش وێرای سەرکۆنە کردنی هێرشەکە، رایگەیاندوە: "حکومەتی عێراق و حکومەتی هەرێمی کوردستان دەستیان بە لێکۆڵینەوەکانیان کردووە".
سەناتۆری کۆماری ولایەتی فلۆریدا مارکۆ روبیۆ بەربژێری سەرۆکایەتی ئەمریکا لە ٢٠١٦دا، لە تویتێکدا نووسیویەتی: ''ئامانجی ئەوان ئەویە کە کشانەوەی تەواوی هێزە سەربارزی و دیپلۆماتەکانی ئەمریکا لە عێراق خێراتر بکەن، ئەمن چاوەرێ دەبم تاکوو بزانم ئایا هێرشی سەر هەولێر راستەوخۆ بوە. چوونکە ئێرانییەکان و تاقمەکانی سەر بەوان زۆر جار هێرشی هاوشێوەیان دژی ئێمە بەکار هێناوە...''
هەروەها لە کاردانەوەیەکی دیکەدا، لیزا مەکلین نوێنەری کۆماری ولایەتی میشیگان لە کۆنگرێس، توویتێکی چرکاندوەو دەڵێ: ''هەواڵێم پێگەیشت کە هێزەکانی سەربە ئێران هێرشی موشەکیان کردۆتە سەر کونسولگەری ئەمریکا لە هەولێر. ئەم هێرشانە ئەو ڕاستییە دەسەلمێنێ کە دەبێ دەمودەست وتووێژی ناوکی لەگەڵ ئێران راگیرن و هەروەها هیچکاتێک نەوتیان لێنەکڕین''.
لە پاڵ ئەمانەدا، ئالەن لوریا نوێنەری دێموکراتی ولایەتی ڤیرجینیا، لە پەیامێکدا دەنووسێ: ''ئەگەر بێتوو هێرشی مووشەکی بۆسەر کونسلگەری ئەمریکا لە هەولێر راست بێ، ئەوە دەبێ بەرێوەبەرایەتی بایدەن دەمودەست، وتووێژی ناوکی لەگەڵ ئێران کۆتایی پێبێنێت. ئێمە ناتوانین بگەڕێینەوە بۆ وتووێژێکی ناوکی شکستخواردوو تاکوو پتر ئێران بەهێز بکەین و بەم جۆرە ئاسایشی جیهانی بخەینە مەترسییەوە''.
هاوکات جەیسۆن برادەسکی سەرۆکی سیاسەتدارێژی رێکخراوی، ''یەکریزی دژی ئێرانی ئەتۆمی''، لە زنجیرە توویێتێکدا دەڵێ: ''رێکەوتی ئەم مووشەکبارانە هاوکاتە لەگەڵ ساڵرۆژی لەدایک بوونی قاسم سولەیمانی، هەر بۆیە دەبێ ساتوکاتی هاویشتنی ئەو موشەکانە لەبەرچاو بگیرێن. هێرشی تۆڵەئەستینی سەر سەربازگەی ''عەین ئەسەد'' وکوو کاردانەوە دژی کوژرانی قاسم سولەیمانی، هەر لەم کاتژمێرەداو بە کەڵک وەرگرتن لەو جۆرە مووشەکانەی ''فاتەحی ١١٠'' بوو.
Thursday, March 10, 2022
Saturday, March 5, 2022
کۆبوونەوەی بەرپرسی ناوەندەکانی ڕەوەندی کوردستانی بەڕێوەچوو
کۆبوونەوەی گشتی بەرپرسی ناوەندەکانی ڕەوەندی کوردستانی بە ئۆنلاین بەڕێوەچوو، ئەوەش بە مەبەستی بیروڕاگۆڕینەوە لەسەر بەرنامەی کار و هەنگاوەکانی داهاتووی ناوەندەکان.
لە دوای بەستنی یەکەمین کۆنگرەی ناوەندی ڕەوەندی کوردستانی لە ھەولێری پایتەختی هەرێمی کوردستان، ئەمە دووەم کۆبوونەوەی ئاسایی بەرپرسی ناوەندەکانە کە بەڕێوەدەچێت، ئەویش بە مەبەستی بیروڕاگۆڕینەوە و گفتوگۆ لەسەر بەرنامەی کار و ھەنگاوەکانی داھاتووی ناوەندەکان لە پراکتیزەکردنی پلانی کار، بەتایبەت مانگی ئادار و کار و چالاکی ناوەندەکان و، ھەڵسەنگاندنێکی خێرایش بۆ ماوەی ڕابردوو .
جێی باسە، دوابەدوای پێشکەش کردنی پلانی کار و وەرگرتنی بیروڕا و پێشنیاری بەرپرسانی ناوەندەکان، کۆبوونەوەکە بە سەرکەوتوویی بەڕێوەچوو
هەنگاونانی کرداری بۆ رێکخستنی کۆنفدراسیۆنی رەوەندی کوردستانی لە ئەمریکاو کەنەدا
لە ماوەی ڕابردووداوو لە دوو حەوتووی بە دوای یەکدا، لە رێگای تۆری کۆمەڵایەتی زوومەوە، بە بەشداری زۆربەی نزیک بە تەواوی رێکخراوە مەدەنیەکانی تۆمار کراوو لە ئەمریکاو کەنەدا، هەروەها بە بەشداری کۆمەڵێکی بەرچاو لە چالاکانی کوردستانی و پسپۆرانی بوارە جۆربەجۆرەکان، کۆبوونەوەکان بە سەرکەوتوویی بەرێوەچوون.لە سەرەتای ئەو کۆبوونەوانەدا، بەرێز رەحیم رەشیدی ناسراوو بە مستەر کورد، ئەندامی دەستەی باڵای کۆنفدراسیۆنی رەوەندی کوردستانی، وێرای بەرزنرخاندنی ئامادەبووانی کۆبوونەوەکان، ئامانج لە ئەرک و کارەکانی یەکخستنی رەوەوەندی کوردستانی لە ئەمریکاو کەنەدا بۆ بەشداران باس کرد.لە ناوەرۆکی کۆبوونەوەکاندا، زۆربەی بەشداران روانگەو دیدی خۆیان لەسەر پێویستی یەکانگیرکردنی تێکۆشانی کوردستانی بۆ خزمەت بە دۆزی رەوای کوردستان دەربڕی.هاوکات، بڕیاری درا کە بۆ ئەوەی رەوەندی کوردستانی بتوانێ لە وڵاتانی ئەمریکای باکوور، بە شێوەیەکی کاریگەر لەسەر سەکۆی شانۆی سیاسەتی ئەو وڵاتانە دەوروو رۆڵی هەبێ، بە شێوەی کرداری دەست بە تێکۆشان بکەن.لەم نێوەدا، کۆمەڵێک بڕیارو راسپاردە هاتنە ئاراوە کە لە رۆژوو حەوتوەکانی داهاتوودا بە کردەوە هەنگاوی بۆ هەڵدەگیرێ.
Thursday, March 3, 2022
ئەنجومەنی شارەداری واشنتن جه‌ژنی نەورۆز بە فەرمی ده‌ناسێنێت
رەحیم رەشیدی\ کوردستان ٢٤، واشنگتن
ئەنجوومەنی شارەوانی واشنگتنی پێتەخت، ئێوارێی رۆژی سێشەممە، رێکەوتی ١ی مارس، رەشنووسێکی پێشنیارکراوی پەسەند کرد کە تێیدا داوا کرابوو چێژنی نەورۆز وەکوو رووداوێکی ''کولتووری و مێژوویی'' بە فەرمیی بناسرێ.
بە گوێرەی راگەیەندراوی ئەنجوومەنی شارەوانی پێتەخت، رەشنووسەکە بە زۆرینەی دەنگی ئەنجوون پەسەند کراوە. هەروەها لە بڕیارنامەی پەسەند کراوی ئەنجوومەنەکەدا، پێشینەی مێژووی نەورۆزو زانیاری دەربارەی تایبەتمەندییەکانی نەورۆز وەکوو دەسپێکی بەهارو ساڵی نوێ ئاماژەی پێکراوە.
لە بەشێکی دیکەی بریارنامەکەدا هاتوە: ''چێژنی مێژوویی نەورۆز، پێشینەیەکی ٣ هەزار ساڵەی هەیە، وەکوو رێکخراوی نەتەوەتەکگرتوەکان پشتراستی کردۆتەوە، پتر لە ٣٠٠ میلیۆن کەس لە جیهاندا ساڵانە ئەم چێژنە پیرۆز دەکەن''.
ئەنجوومەنی شارەداری شاری واشنگتن، لە بەشێکی دیکەی بڕیارنامەکەدا وتویەتی: ''خەڵک بە پێشینەی کولتووری، رەگەزی و ئایینی جیاواز کە هەیانە، نەورۆز چێژن دەگرن. لەو نێوەدا، کریستانەکان، موسڵمانان، جوو، بەهایی، زەرتەشتی و هەروەها دیندارو بێ دین، چێژنی نەورۆز پیرۆز دەکەن''.
ئەنجوومەنەکە لە بەشێکی دیکەی بڵاوکراوەکەیدا نووسیویەتی: ''نەورۆز لە لایەن رێکخراوی نەتەوەیەکگرتوەکانەوە، وەکوو میراتێکی کولتووری مرۆڤایەتی بە فەرمیی دەناسرێ کە لە لایەن خەڵکێکی زۆر لە جیهاندا رێز لەم سامانە کولتورری و کەلەپوورییە دەگیردرێ''.
بە پەسەند کردنی ئەم بڕیارنامەیە، ئەنجوومەنی شارەداری شاری واشنگتن، وێرای بە فەرمیی ناسینی نەورۆز وەکوو چێژنێکی دیرۆکی، هاوکات لەمەوپاش لە رۆژژمێری فەرمیی شاردا، دەیگونجێنێ.
رێکخراوی نەتەوەیەکگرتوەکان ساڵی ٢٠١٠ بە پەسەند کردنی بڕیارنامەیەک، چێژنی نەورۆزی وەکوو چێژنێکی نێونەتەوەیی بە فەرمیی ناسی.
چێژنی نەورۆز لە کوردستان دەستپەکی ساڵی نوێ و بوژانەوەی سروشت و هاتنی بەهارو زاڵ بوونی روناکی بەسەر تاریکیدایە. هەروەها نەورۆز هێمای خەبات و کۆڵنەدان بۆ ئازادی و سەربەستییە. کوردستانیان لە دەرەوەی وڵاتیش بە شایی و گۆڤەند و رێخستنی کۆڕو کۆمەڵ و سەیران، رۆحی ئەم جێژنەیان بە زیندوویی و پیرۆزی ڕاگرتوە.
بایدن: مێژوو دەنووسێت کە پووتن رووسیای لاواز کرد
وەکوو نەریتی ساڵانە، کاتژمێر ٩ی شەوی سێشەممە، ١ی مارس، سەرۆک بایدەن وتاری ساڵانەی خۆی لە نێو ئەندامانی کۆنگرێس و ئەنجوومەنی پیرانی هەر دوو حیزبی کۆماری و دێموکرات لە کۆنگرێس پێشکەش کرد. هاوکات باڵوێزی ئۆکراینا لە ئەمریکا ئامادەی کۆبوونەوەکە بوو.
سەرۆک قسەکانی بە ستایش و پێزانیین بۆ خەبات و خۆراگری خەڵکی ئۆکراین دەست پێکردو لەم بەستێنەدا وتی: ''ئێمە بە درێژایی مێژوو ئەو وانەیە فێر بووین، کاتێک ملهورەکان باجی دەسدرێژیەکانیان نادەن، دەبنە هۆکاری بێسەروبەری پتر. ئەوان درێژە بە کردەوەکانیان دەدەن و بەم جۆرە مەترسی و تێچووی ئەو هەرەشانەش لەسەر ئەمریکاو جیهان پتر دەبێ''.
سەرۆک لە درێژەدا وتی: رێکخراوی ناتۆ، پاش شەری دووهەمی جیهانی و بۆ سەقامگیری و ئاشتی لە ئورووپا پاش شەری دووهەمی جیهانی هاتۆتە ئاراوە کە ئەمریکا وێرای ٢٩ وڵاتی دیکە تێیدا ئەندامن''.
سەرۆک لە بەشێکی دیکەی قسەکانی دا هێرشی کردە سەرۆ ڤلادەمیر پوتین سەرۆکی ڕووسیاو بەوەی تاوانبار کرد کە ناوبراو پێی وابوە بە هەڵگیرسانی ئەو شەرە لە دژی ئۆکراینا دەتوانی یەکریزی خەڵکی ئەمریکا تێکبدات و ناتۆو ئەمریکا ناتوانن لە بەرانبەریدا بوەستن.
سەرۆک لە درێژەدا باسی لەوە کرد کە پوتین لە لێکدانەوەکانیدا بەهەڵەدا چوەو ئەمرۆ ئەمریکاو هاوبەشە ئورووپاییەکانی یەکریزن و پێکەوە کار دەکەن تاکوو بەربەست لەبەردەمیدا ساز بکەن. سەرۆک رایگەیاند اەمرۆ جیهان پوتین بە تاوانباری دۆخی ئۆکراینا دەزانێ.
بایدەن وێرای پێداگری لەسەر پشتیوانی کردنی گەلی ئۆکراینا، بەڵام دووپاتی کردەوە کە ئەمریکا لە قەیرانی ئۆکراینادا دەستێوەردانی چەکداری ناکات.
بەشی دووهەمی وتاری سەرۆک ئاوردانەوە بۆسەر بەرنامەو سیاسەتە نێوخۆییەکانی بوو.
لەم بەستەنەدا، بایدەن پەرژایە سەر ئەوەی کە دەبێ بەرهەمهێنان لە ئەمریکا پەرە پێبدەرێ و داوای کرد خەڵک پتر شتومەکی ئەمریکایی بکرن. هاوکات بۆ داشکانی ئاوسانی ئابووری باسی لەهەوڵدان بۆ بوژانەوەی بازارو رەخساندنی هەلی کار کردو داوای کرد دەسمایەدارانی ئەمریکایی سەرمایەکانیان لە نێوخۆی ئەمریکا وەگڕ بخەن.
لە بەشێکی دیکەی وتارەکەیدا بایدەن، باسی لە کاریگەرییەکانی کۆرۆناو کردو لەم پێوەندیەدا وێرای ئاماژەدان بە بردنەسەرێی رێژەی مووچەو حەقدەست، موژدەی خزمەتگوزاری باشتر بۆ نەخۆش و بەساڵاچوان و رووبەروو بوونەوەی نەخۆشییە درێژخایەن و کوشەندەکانیدا کرد.
لە بەرانبەردا، وەکوو باوە، کیم رینولدەز ، فەرمانداری ولایەتی ئایووا، لە پلەی نوێنەری کۆمارییەکان، رەخنەی لە قسەکانی سەرۆک گرت. نوێنەری کۆمارییەکانی جەوهەری وڵامەکەی بۆ وتاری سەرۆک لەسەر ئەوە چڕ کردبوەو کە ئەمریکا لە ئاستی جیهانی دا لاواز
بوەو کشانەوەی سپای ئەمریکای لە ئەفغانستان بە هەڵەیەکی ئەوتۆ ناوبرد کە دوژمنانی ئەمریکای بێچاوورووتر کردوە.
هاوکات بە جیدیش پەرژایە سەر دۆخی خراپی ئابووری ئەمریکاو لەم بەستێنەدا ئاماژەی بە رێژەی هەڵکشانی بێکاری و ئاوسانی ئابووری کردو دژی سیاسەتی بایدەن لە بواری کۆچبەریشدا وەستایەوە.
Subscribe to:
Posts (Atom)