Archive

Tuesday, January 10, 2006

قسه‌م بۆ ده‌كات و به‌ هه‌ر پیڤێكی دونیاێك ئاوه‌دانی ده‌ڕژێنێته‌ ناوو ده‌روونمه‌وه.ڕه‌سته‌ێك ئێژێت و،هه‌موو گیانم مچۆركی پێدا دێت وئه‌مه‌وێت تاكوو ده‌نگم بڕ ده‌كات هاوار بكه‌م كه،‌ خۆشم ئه‌وێت.ده‌ڵێ :" ناخۆشترین شت ئاشق بوونه،‌ خۆشترین شت ئارامی و ته‌نهاییه‌" .

توشی بیر کردنه‌وه‌ێکی سه‌یری کردووم.له‌ ناو ژوره ته‌نگ‌و تاریکه‌که‌م‌دا دێم‌و ده‌چم.بیری ئه‌م قسه‌ی (ئێریک فرۆم )که‌وتوومه‌ته‌وه‌ که‌ ئه‌ڵێت: "ئه‌وانه‌ی ناتوانن ته‌نهایی ته‌حه‌موول که‌ن هه‌رگیز ناتوانن که‌سێکیان خۆش بوێت..."

هه‌روه‌ها ئه‌ڵێت:" ئاشق بوون ته‌نها هه‌ستێک نییه‌،به‌ڵکوو بڕیارێکی گرینگیشه..."

به‌ خۆم ده‌ڵێم:له‌‌ وانه‌ییه‌ نه‌توانێت بڕیارێکی گرینگ بدات...

نازانم بۆ ده‌مهه‌وێت به‌ر له‌ ماڵئاوایی یه‌ک جاری، هه‌موو ئاسه‌واره‌کانی په‌نجه‌ت له‌ سه‌ر جه‌سته‌م دامالم‌و ره‌نگو ڕووی سیمات له‌ سه‌ر تابلۆی روخسارم پاک که‌مه‌وه.هاورێم به‌ هه‌ر گوزه‌رێک‌دا ده‌ڕۆم هه‌ناسه‌کانی تۆ تێم ده‌‌ئاڵین‌و له‌ به‌ر ده‌ما سه‌ما ده‌که‌ن.ئه‌گه‌ر بزانییت ئێستا چ ئازارێک گیانم ده‌خوات هه‌رگیز له‌م ئێواره‌ سارد‌و توشه‌دا به‌ ته‌نهاییت نه‌ده‌سپاردم‌.له‌‌م شاره‌ پڕ جموو جۆله‌دا ته‌‌‌نیاتر له‌جاران به‌ دوایی جوتێک چاوی ئاشناوه‌م‌و عه‌ودال‌و سه‌ر گه‌ردان دێم‌و ده‌‌چم.ئه‌بێت هه‌موو ژیان بگۆرم‌و ئه‌و شه‌وانه‌ی که‌ پێکه‌وه تێک ده‌ئاڵایین‌و شرابی ئه‌شقمان ده‌نۆشێ سه‌ربڕم‌.له‌ بیرته‌ که‌ به‌ هه‌ر مه‌ڵبه‌ندێک‌دا گوزه‌رمان ده‌کرد به‌هارێک له‌ دایک ده‌بوو؟ بڕیار بوو پێکه‌وه‌و بۆ یه‌ک بمرین‌و په‌نجه‌کانمان بۆهه‌میشه ئاشنا به‌یه‌ک بن‌و نه‌رم‌تر له‌ بالی په‌پووله‌کان میوانی ره‌زا سوکی یه‌کتر بن. چه‌ن هیوامان په‌روه‌رده‌ کرد بۆ( باران) ئه‌زانیت،هه‌میشه حه‌زی ماچه‌کانی ئێمه‌ له‌ گه‌ل باران گوڵی ئه‌کردو هه‌ر له‌ ته‌نیشت بارانیش‌دا هه‌موو درگاکانمان ئه‌خسته‌ سه‌ر پشت.ئێستا بۆ ماڵئاوایی یه‌ک‌جاری من ئه‌بێت ژیان سه‌ر بڕم‌.هاورێم من ژیانم بۆ سه‌ر نابڕدرێت‌و چیدی که‌ مه‌به‌ به‌ گه‌رده‌لوول‌و، زستانێکی شوومه من ئه‌م مالئاواییه‌ ناکه‌م‌و ژیانم پێ سه‌ر نابڕدرێت‌و خۆم له‌ جاوی ئه‌ستێره‌کان پێ وون ناکرێت‌و ساتێکیش بێ باران ئاوه‌دان نابم.
له‌ په‌نجه‌ره‌ی بێ به‌ختی خۆمه‌وه
له‌م پاییزه‌ رۆح سووكه‌ ده‌ڕوانم
چه‌ن مێهره‌بان سروشت ده‌لێسێته‌وه
چ پڕ ئازاره‌ كه‌ پاییز،هه‌‌ناسه‌ قوڵه‌كانی من و
خه‌ونه‌ وه‌دی نه‌هاتوه‌كانی دایكم
ئه‌كاته‌ ره‌نگی باڵای خۆی!
چه‌ن قورسه‌ كه‌ پاییز بۆته‌ تابلۆ
بۆ لێك گرێ دانه‌وه‌ی من و
ئه‌و ئاواتانه‌ی له‌ دایكم تۆران
چه‌نده‌ سه‌خته‌ كه‌ وه‌رزه‌كانیش
هێماێك بن بۆ خه‌مه‌كانمان