Archive

Thursday, September 29, 2011

لێم ناپرسی، پێم وایه‌ ده‌نگت لێداگۆڕیووم/ سه‌رتاپای له‌شم تاوو له‌رز دایده‌گرێ/ترس ده‌خزێته‌ ده‌ماره‌کانمه‌وه‌و رۆحم ده‌گووشێ/ من چه‌نگ له‌ هه‌موو شوێنێک ده‌ده‌م‌/خه‌ریکه‌ سوێم بێته‌وه‌/ وه‌کوو تفلێکی ساوا نه‌خۆش ده‌بم/ته‌نیا هه‌واڵی بێمزه‌ڕه‌دی تۆ/ ده‌ردی من تیمار ده‌کات/.

Saturday, September 17, 2011

شرکت در برنامه‌ " تفسیر خبر" صدای آمریکا:

برسی رویدادهای اخیر تبریز و نقض حقوق بشر در کردستان با شرکت رحیم رشیدی, اکبر عطری و امیرحسین موحدی در برنامه "تفسیر خبر" بخش فارسی صدای آمریکا.


شما می‌توانید با کلیک کردن بر روی این لینک‌، برنامه‌ را مشاهده‌ فرمائید.


Tuesday, September 6, 2011

گوڵێ

به‌ ژێر لێزمه‌ی بارانێکی به‌خۆڕدا تێده‌پڕی. چه‌تره‌که‌ت داداوه‌ته‌وه‌و ئاو له‌ سه‌رتاپای وجووت ده‌چۆڕێ، له‌ ته‌نیشت جاده‌یه‌کی دوورودرێژ که‌ سه‌دان ماشێنی جۆراوجۆری پێدا ده‌ڕوا ڕاوه‌ستاوی، چاوه‌ڕێی چرای په‌ڕێنه‌وه‌ سه‌وز بێ بۆ ئه‌وه‌ی ده‌رباز بی‌و برۆیته‌ ئه‌و به‌ری رێگاکه‌.
خه‌ڵک له‌ نێو ماشێنه‌کان‌دا سه‌یرت ده‌که‌ن، چۆنه‌ چه‌ترت به‌ ده‌سته‌وه‌یه‌و هه‌ڵتنه‌داوه‌، نه‌ختاڵێک سه‌رسووڕماون، له‌ کاتێک‌دا لێره‌ بۆن‌و ره‌نگی دۆلار هه‌موو هه‌ستێکی کردوه‌ به‌ ژێره‌وه‌و ئه‌بێ به‌رده‌وام چالاک‌و ته‌ندروست بی‌ بۆ ئه‌وه‌ی بژی‌و بۆ نه‌ختاڵێک ژیان هه‌رده‌م له‌ ڕاکردن‌دا بیت؛ زۆر ئاسایی نیه‌ که‌ رێگا بده‌یت ئه‌م بارانه‌ ئاوا سوک‌وسانا بتلێسێته‌وه‌؛ ره‌نگه‌ که‌نه‌فتیت تووش کات!
ئه‌ته‌وێ بارانی ئه‌م ئێواره‌یه‌ هه‌موو نه‌گبه‌تی‌و ئازاره‌کانی دووری ئه‌م هه‌موو ساڵه‌ بشواته‌وه‌، ده‌خوازی هه‌ر باران گه‌ردی ئه‌م هه‌موو مه‌ودایانه‌ له‌گه‌ڵ خۆی ڕاماڵێ.
بیر له‌وه‌ ده‌که‌یه‌وه‌ که‌ بارانی هه‌موو جێگایه‌ک، له‌ واشینگتۆن، سه‌قز، پاریس، ئیستانبوڵ، کرماشان، مه‌هاباد، سنه‌، دیاربه‌کر، سه‌رده‌شت‌‌، تاران، دیمشق‌و ورمێ‌و قامیشلۆ بێ، یان له‌ پیرتریین‌‌و دوورتریین شوێنی دونیا، جه‌سته‌ی زه‌وی نماوی ده‌کات‌و پرچی سروشت داده‌هێنێت.

"دیدار
بۆنی خاکی نماوی‌و باران
له‌ پرچه‌ خه‌واڵوه‌کانت ده‌هات
ئه‌و کاته‌ سه‌وزه‌ی
له‌ ئاسمانی شێعره‌کانه‌وه‌
هاتی..."
ئه‌مشه‌و که‌سێک ئه‌و چیرۆکه‌ت بۆ ده‌گێرێته‌وه‌ که‌ 12 کاتژمێر به‌ فرۆکه‌ فڕیوه‌ بۆ ئه‌وه‌ی دوو رۆژ‌و سێ شه‌و له‌ "کوێستان‌‌"دا ئۆقره‌ بگرێ‌و له‌گه‌ڵ سپێده‌ ماچی لێوی "به‌یان" بکات، هه‌ر له‌گه‌ڵ کوێستان‌دا بخزێته‌ رۆژه‌کانه‌وه‌و به‌ هه‌ناسه‌ بڕکێ‌‌و به‌ په‌له‌ په‌ل‌و هه‌ڵه‌داوان به‌ شه‌قامه‌کانی هه‌ولێر، واشینگتۆن‌، ئامستردام‌، ئۆسلۆ، ستوکهۆڵم، مسکۆ، ڤیه‌ن، ئاتن، رۆم‌، ئوتاوا، قاهیره‌، دوبه‌ی، له‌نده‌ن‌و برلین‌دا تێپه‌ڕ بێ ته‌نیا بۆ ئه‌وه‌ی به‌ دوو قۆڵی له‌ نێو جه‌رگه‌ی شاری "سیمۆن دووبوار" پیاسه‌ بکه‌ن‌و به‌ ده‌م ماچه‌وه‌ په‌یامی دیمه‌نه‌کانی "کازابلانکا" یان فه‌لسه‌فه‌ی "رۆسۆ" شرۆڤه‌ بکه‌ن‌، یان له‌ کاتی قاوه‌‌و شه‌راب خواردنه‌وه‌‌دا پێیان له‌ نێو ئاوی رووباری "سێن" بژنن...
چه‌ن خۆشه‌، ئه‌مشه‌و که‌سێک دڵه‌ کوته‌یه‌تی‌، ئه‌وینی هه‌ر ده‌م به‌رۆژ ده‌بێته‌وه‌، ماوه‌و دابڕانی ئه‌و هه‌رگیز سه‌رتاپای وجوودی ئاگرینتی دانه‌مرکاندبێ!
چ سێحرێکه‌، ئێژی ساڵانێکی زۆره‌، هه‌موو ساڵێک له‌م رۆژه‌دا، له‌ پازده‌ی شه‌شه‌مین مانگی ساڵ‌دا، شایی بکه‌ی، دڵت خۆش بێ‌و به‌ تۆماری یادگارییه‌کانت‌دا بچیته‌وه‌و له‌ ئاست دژواریه‌کان‌دا پێستت ئه‌ستوورو ئه‌ستوورتر بێ؟.
چی هه‌یه‌ وات لێبکات که‌ باوشێک گوڵی سوور له‌ ته‌نیشتت، له‌سه‌ره‌خۆو شادمان شه‌رابێکی یاقووتی بنۆشی‌و سه‌یرتر له‌ هه‌موو شتێک، له‌ هوتێلێک مابێتیه‌وه‌ که‌ به‌ پێ ته‌نیا چاره‌که‌ کاتژمێرێک له‌ ماڵه‌که‌ت دووره‌، لێره چه‌ند مۆم داگیرساون، "گوڵی خوێناوی هۆمه‌ر دزه‌یی"‌ ده‌بیسرێ؛ گۆرانی "خه‌ونم ئه‌دی" به‌رده‌وام دووپات ده‌بێته‌وه‌. جاروباره‌ش "لارا فابین"، به‌ گۆرانی "من نه‌خۆشم" یان "خۆشم ده‌وێی" به‌ره‌و بڕگه‌و بواره جوانه‌کانی هونه‌ر په‌لکێشت ده‌کات‌‌‌، بیر له‌وه‌ ده‌که‌یته‌وه‌ هه‌ر ئێستا قادر ئه‌لیاسی به‌ ده‌نگی‌ هه‌ست بزوێن‌و هونه‌ری ته‌ژی له‌ ره‌سه‌نایه‌تی هۆنراوه‌ی "گوڵ جه‌بین" بچڕێ‌، یان خۆزگه‌ ده‌خوازی ئه‌م شاکاره‌ی کردبێته‌ گۆرانی‌و به‌ڵکوو هه‌ر ئه‌و به‌م چه‌شنه‌ ئاوپڕژێنی شه‌قام‌و کۆڵانه‌ پڕ بیره‌وه‌رییه‌کانی ئه‌و دڵه‌ ئۆقره‌ نه‌گرتوانه‌ بکات که‌ ده‌ردی دووری هه‌رگیز ناهێڵێ برینی دابڕان سارێژ ببنه‌وه‌...
ئه‌وه‌ ساڵانێکی زۆره‌ که‌ که‌یکه‌کانی ئه‌م یاده‌ ژوماره‌یه‌کی تایبه‌تی له‌سه‌ر ده‌نووسرێ، ئه‌وجار ته‌نیا ژوماره‌ دوو ده‌بیندرێ، ره‌نگه‌ یادوه‌ری دواین دیداری دوو ساڵ یان دوو مانگی رابردوو بێ. دوو حه‌وتو، دوو رۆژ یان دوو کاتژمێرو چه‌ند خوله‌کی به‌ر له‌ ئێستا بێت.
ئه‌زانم که‌سێک هاوژینه‌که‌ی خۆی رازی کردوه‌ که‌ ئه‌م شه‌و به‌ ته‌نیا بێ، ئه‌بێ کام هه‌ستی سێحراوی هێزی ئه‌م رازیکردنه‌ی پێبه‌خشیبێت؟
بیر له‌وه‌ بکه‌ره‌وه‌ ئه‌گه‌ر هات‌و سه‌دان هه‌زار کیلۆمیتر رێگات بڕی، هیچ جلوبه‌رگێک بۆ دڵداره‌که‌ت نه‌به‌یت، له‌به‌ر ئه‌وه‌ ئه‌بێ بۆ خولقاندنی قوڵترین ساته‌کان، بۆ ده‌مێکی ته‌ژی له‌ ته‌کان‌و جووڵه‌، بۆ هه‌ناسه‌ بڕکێ‌و تێکئاڵان، پێویسته‌ زۆرترین کات به‌ بێ ئه‌وه‌ی پۆشته‌ بی له‌ باوشیا بمێنیه‌وه‌‌و خۆت به‌ سینگیه‌وه‌ ئاوێزان بکه‌یت، ده‌ستی وه‌فا له‌ داوێنی گیر که‌یت‌و به‌ ئارامی‌و له‌سه‌ره‌خۆ سه‌رتاپای جه‌سته‌ی به‌ لێو بماڵیت‌، نوقمی ماچی بکه‌یت‌و وه‌کوو په‌ڕی گوڵ به‌ ئه‌سپایی ئه‌مدیوو ئه‌و دیوی که‌یت، ئاوا جه‌سته‌ت گڕاوییه‌و ره‌نگه‌ که‌سێک هه‌ر ده‌م شاعیری تۆ بمێنێته‌وه‌...
باران ورده‌ ورده‌ له‌ شووشه‌ی په‌نجه‌ره‌ی ژووره‌که‌ت ده‌دات، که‌چی تۆ دڵنیاو هیوادار، بیر له‌وه‌ ده‌که‌یته‌وه‌ که‌ی‌و له‌ کوێ‌و چۆن گوڵی خۆت له‌ نێو باغ‌دا ده‌بینیه‌وه‌و بۆنی ده‌که‌ی‌و هه‌ناسه‌ی بۆ نێو سیه‌کانت هه‌ڵده‌مژی. رۆحی ماندووت له‌گه‌ڵ جه‌سته‌ی نیوه‌ ساردو تۆراوی ئاشت ده‌که‌یه‌وه‌...
هه‌نووکه‌، که‌مێک سه‌رت گه‌رم داهاتوه‌، پتر هه‌ست ده‌که‌ی هێزی ژیان خولقێنی ئه‌وین وه‌کوو هه‌میشه‌ سه‌وزه‌، یادی که‌سێک له‌وپه‌ڕی دونیا به‌ زیندوویی له‌ هه‌ناوت‌دا پارێزراوه‌و ته‌نانه‌ت وزه‌ی بڕینی رێگا تووش‌و ئاسته‌مه‌کانه‌، وره‌ی زاڵ بوون به‌سه‌ر ئاسته‌نگ‌و نه‌هامه‌تیه‌کانه‌.

له‌به‌ر خۆته‌وه‌ ده‌ڵێی: به‌ ئاواتی گه‌شتریین ساته‌کان ئه‌ی کوێستانه‌که‌م، هه‌میشه‌ ده‌روونم بۆت گه‌رم‌و گوڕه‌. هه‌ر تۆ ته‌نیا گوڵی نێو گوڵزاری یاده‌کانمی. رۆژه‌کان ده‌بژێرم‌و ساته‌کان له‌سه‌ریه‌ک هه‌ڵده‌چنم بۆ ئه‌وه‌ی بتبینمه‌وه‌. که‌م یان زۆر گرینگ نیه‌. ئه‌وه‌ی پێویست‌و گرینگه‌ دیداری تۆیه‌ ئه‌ی مه‌حبووبه‌که‌م.‌

کات شادو ئاگات له‌ چاوه‌کانت بێت.
15ی خه‌رمانانی 1390
6ی سپتامبری 2011
واشینگتۆن