یادێک له مامۆستا هه‌ژار!

یادێک له مامۆستا هه‌ژار!
هه‌موو ساڵێك، رێکه‌وتی 21ی مانگی فورییه به‌رانبه‌ر به 2ی ڕه‌شمه، یادی كۆچی دوایی مامۆستا هه‌ژار ئه‌دیب‌و زمانه‌ڤانی به‌توانا‌و لێهاتووی کورد كه له ساڵی 1991 زایینی، به‌رانبه‌ر به 1370ی هه‌تاوی، له ته‌مه‌نی هه‌فتاد ساڵی‌دا كۆچی دوایی کرد، یادی به‌رز ڕاده‌گیرێت.
عه‌بدولڕه‌حمان شه‌رفكه‌ندی که به مامۆستا هه‌ژار ناسراوه ، ساڵی 1921 له بنه‌ماڵه‌یه‌کی ئایینی له شاری مه‌هاباد له دایک بووه. شایانی باسه هه‌ژار برا گه‌وره‌ی دوکتور شه‌ره‌فکه‌ندی سکرتێری گشتیی پێشووی حدکا بووه‌.
مامۆستا هه‌ژار که خوێندنی ئایینی خوێند بوو، شاره‌زایه‌کی ته‌واوی له زمان‌و وێژه‌ی کوردی هه‌بوو. ناوباراو یه‌کێک له به‌شدارانی پێکهاتنی کۆماری کوردستان‌و ئه‌ندامی کۆمه‌ڵه‌ی ژیانه‌وه‌ی کورد (ژێ کاف) بووه.
پاش ڕووخانی ده‌وڵه‌تی جمهوری کوردستان، هه‌ژار ڕووی كردۆته كوردستانی باشوورو دواییش له شاری به‌غدا نیشته‌جێ بووه.
به دوای ڕێككه‌وتتنامه‌ی 11ی ئازاری 1970ی زایینی، چووه شاری به‌غداد بۆ سازدان‌و ڕێکخستنی كارووباری یه‌كیه‌تیی نووسه‌رانی كورد که رێکه‌وتی 10 02 1970 دامه‌زرا بوو، هه‌ژار بۆ ماوه‌یه‌ک سه‌رۆکی یه‌کیه‌تیی نووسه‌رانی کورد بووه. ناوابراو پاش شۆرشی گه‌ڵانی ئێران گۆڤاری ئه‌ده‌بی ئاوێنه‌ی له ئێران بڵاو ده‌کردوه‌وه. مامۆستا هه‌ژار ساڵی 1370ی هه‌تاوی له شاری که‌ره‌ج کۆچی دوایی کردو پاشان ته‌رمه‌که‌ی به‌رێزه‌وه له گۆرشتانی بوداغسوڵتانی شاری مه‌هاباد له نێو ئاپۆڕای جه‌ماوه‌ردا له ته‌نیشت کۆنه‌ یاری خۆی واته مامۆستا هێمن‌ به خاک سپێردرا.
هه‌ژار له ژیانی‌دا کوێره‌وه‌ری‌و چه‌رمه‌سه‌ری زۆری دیتووه، رۆحی شاد بێت‌و نموونه‌ی وه‌کوو هه‌ژار بۆ خزمه‌تی زمان‌و وێژه‌ی کورد زۆر بن.
هه‌ژار وێرای وه‌رگێرانی شه‌رفنامه‌و چوارینه‌کانی خه‌یام‌و " قانون در طب" ئه‌بو عه‌لی سینا، زۆر بابه‌تی دیکه‌ی به‌پێزو سوودمه‌ند، ئه‌م بڵاوو کراوانه‌شیی هه‌ن.
1. دیوانه شێعری بۆ كوردستان
2. به‌یتی سه‌ره مه‌ڕ.
3. هۆزی له بیركراوی گاوان، له عه‌ره‌بییه‌وه كردوویه به كوردی، له نووسینی دوكتۆر مسته‌فا جه‌واد.
4. دیوانی شێخ ئه‌حمه‌دی جزیری، ده‌ق‌و مانا لێكدانه‌وه.
5. فه‌رهه‌نگی هه‌مبانه بۆرینه (كوردی، كوردی، فارسی) .
6. په‌رتووكی چێشتی مجێوه‌ر، ژیان‌و بیره‌وه‌ریه‌کانی هه‌ژار له خۆ ده‌گرێت.
7. وه‌رگێڕانی قورئان بۆ سه‌ر زمانی كوردی...هتد.