قانعی فەرد و سەرۆکی هەرێمی کوردستان
عیرفان قانعی فەرد هێڕش دەکاتە سەر سەرجەم سەرکردەکانی کوردستان و هەموویان بە "خائین" ناو دەبات و حکومەتی هەرێمی کوردستانیش دەڵێت "ئەو کەسە لە شوێنێکی دیاریکراو راسپێردراوە بەڵام وا بۆی ناچێتە سەر".
ئەمڕۆ کاژێر 4ی ئێوارێ بەکاتی ئەمریکا، عیرفان قانعی فەرد لە بەرنامەیەکی راستەوخۆی کاناڵی ئەندێشە تی ڤی (کە سەر بە ئۆپۆزیسیۆنی ئێرانە و لە لۆس ئەنجلسی ئەمریکا بڵاو دەبێتەوە) وەک لێکۆڵەرێکی کورد مێژووی خەباتی سیاسی کورد لە هەر چوارپارچەی کوردستانی خستە ژێر رەخنەو هێڕشەوە و رایگەیاند "حیزبەکانی کوردستان هیچ پێگەیەکیان لەناو خەڵکی کورد دانییە و بەزۆر خۆیان بەسەر خەڵکدا سەپاندووە".
قانعی فەرد گوتیشی "خاکی کوردستان بەشێکی دانەبڕوای خاكی ئێرانە و چەمکی نەتەوە چەمکی کەسانی دواکەوتوو و کۆنەپەرستە کە بۆ کورد بەکاری دێنن. لە ئێراندا نەتەوەی کورد و خاکی کوردستان بوونی نییە، تەنها یەک نەتەوە و یەک خاک هەیە کە ئەویش نەتەوەی ئێران و خاکی ئێرانە".
د. کاوە مەحمود گوتەبێژی حکومەتی هەرێمی کوردستان و وەزیری رۆشنبیری و لاوان لەو بارەوە بە (رووداو)ی راگەیاند"هۆشمەندی خەڵکی کوردستان ئەوەندە بەرفراوانە کە بتوانێت هەڵسەنگاندنی هەبێت بۆ سەرکردەکانی خۆی و ئەم جۆرە هێڕشە پڕوپوچانە کاریگەری ناکات لەسەر تێڕوانینی خەڵکی کوردستان و کار و کۆششی سەرکردەکانی".
د. کاوە گوتیشی "تێگەیشتوویی خەڵکی کوردستان لەوە لەسەرترە فریوی کابرایەک بخوات لە لایەنێکی دیاریکراوەوە پارەی پێدراوە و راسپێردراوە بۆ شێواندنی مێژووی کورد و خەباتی رزگاریخوازی گەلی کوردستان و ئەو کەسە بەو شێوەیە بۆی ناڕواتە سەر و ناتوانێت هیچ بکات".
هەر لەو بەرنامەیەدا، قانعی فەرد سەرجەم مێژووی سیاسی رۆژهەڵاتی کوردستانی بە مێژووی پڕ لە خەیانەت و ناپاکی ناوبرد و گوتی "حیزبی دیموکرات و کۆمەڵە بەکرێگیراوی سەدام و رژێمی بەعس بوون کە لە شەڕی نێوان ئێران و عێراقدا لەگەڵ سەربازانی بەعس تەقەیان لە سەربازانی ئێران دەکرد. ئەو دوو حیزبە ئەو شیاویەیان نییە بێن و بەناو کۆمەڵگای کورد قسە بکەن. من رێگە لە خەیاڵ و رۆیاکانی ئەو دوو حیزبە ناگرم بەڵام بەمەرجێک رۆیاکانیان لەسەر لاپەرەکان بکێشنەوە و بەناوی خەڵکی کورد قسە نەکەن. کۆمەڵە و دیموکرات وەک دوو گرێی شێرپەنجەئاسا وان کە پێویستە لەناو ببردرێن و ئێران و ئێرانی بتوانن بزووتنەوەیەکی ئاشتیانە و عاقڵانەیان هەبێت".
قانعی فەرد سەبارەت بە پارتی ژیانی ئازادی کوردستان PJAK گوتی "PJAK گروپێکە کە مامەڵە بە مادە هۆشبەرەکان دەکات و تەنها هۆکاری دامەزراندنی لاوازکردنی بزووتنەوەی کوردە. ئێستاکە ئەوان لەگەڵ بەشار ئەسەد رێککەوتننامەیان واژۆ کردووە و پاڵپشتی لە ئەسەد دەکەن. ئێستاکە PJAK و PKK لە کوردستانی سووریا ئاڵایان هەڵکردووە و وێنەی ئۆجەلان و بەشار ئەسەدیان بەیەکەوە داناوە".
ناوبراو لە بەشێکی دیکەدا هێڕشی کردە سەر مێژووی سیاسی باشووری کوردستان و بەتایبەت بنەماڵەی بارزانی و گوتی "مستەفا بارزانی خوێندەواری نەبووە تا مەلا بێت و بەپێی بەڵگەنامەکانی سۆڤییەت، هیچ خولێکی ئاکادیمی سەربازی نەبینیوە تا ژەنەڕاڵ بێت. بارزانی تەنانەت مەلازمیش نەبووە چبگا بە ژە نەڕاڵ بوون".
قانعی فەرد گوتیشی "بارزانی ئێستا لە تورکیا نزیک بووەتەوە و لە کۆنگرەی AKP رایگەیاند (سیاسەتی ئێمە لە سیاسەتەکانی تورکیا نزیکە). کەچی سیاسەتی تورکیا شتێک جگە لە کورد کوژی نییە. بارزانی ستراتیژییەکی ناڕوونی گرتووەتە بەر کە دیار نییە کوردستان بەرەو کوێ دەبات. بارزانی بازرگانی بە پرسی دەوڵەتی کوردی دەکات".
ئەو هەروەها پاڵپشتی لە سیاسەتەکانی نوری مالیکی کرد و گوتی "بنەماڵەی بارزانی خەریکی حەپەلۆش کردنی نەوت و سامانی ئەو وڵاتەن بەبێ ئەوەیکە پارە و داهاتی ئەو نەوتە بۆ حکومەتی عێراق بگەڕێننەوە".
قانعی فەرد لەو دیدارەدا عەبدوڵڵا ئۆجەلانی سەرۆکی پارتی کرێکارانی کوردستانیشی لە هێڕشەکانی بێبەش نەکرد و گوتی "ئۆجەلان خۆی بە سەرۆکی کوردستان ناساندووە کەچی زمانی کوردی نازانێت و لەکاتی دەستگیرکردنیدا لە هەموو ئامانجەکانی پاشەکشەی کرد و تەنانەت گوتی من تورکم و دایکیشم تورکە".
عیرفان قانعی فەرد، بە گوتەی خۆی، لەدایکبووی شاری مەریوانی رۆژهەڵاتی کوردستانه و دکتۆرای لە بەشی زمانناسی له زانکۆی کامبریجی بەریتانیا وەرگرتووە و وەک دەڵێت "ماوەیەک مامۆستای زانکۆی میشیگانی ئەمریکا و کامبریجی بەریتانیا بووە".
ناوبراو دوای ئەوەی سەردانی هەرێمی کوردستان کرد و هەڤپەیڤینی لەگەڵ هەندێک سەرکردەی کورد ئەنجامدا و لەوانەش: مەسعود بارزانی، جەلال تاڵەبانی و عەبدوڵڵا حەسەنزاده لەناو خەڵکدا ناسرا و ئێستا خۆی وەکو لێکۆڵەر، وەرگێڕ، نووسەر، رۆژنامەنووس و رەخنەگری کورد دەناسێنێت.
قانعی فەرد دەڵێت "لە چاوپێکەوتنیدا لەگەڵ جەلال تاڵەبانی، مۆڵەتی نووسینەوەی بیرەوەرییەکانی ژیانی لێ وەرگرتووە هەرچەند بڵاوکردنەوەی بیرەوەرییەکانی مام جەلال لە دوو بەرگدا لەژێر نێوی (دوای شەست ساڵ) هەڵایەکی زۆری لە شەقامی کوردی نایەوە و کاردانەوەی فەرمی یەکێتی نیشتمانی کوردستانی لێکەوتەوە و یەکێتی رایگەیاند ئەو واژۆیەی بەناوی مام جەلال لەسەر کتێبەکەی قانعی فەرد دانراوە ساختەیە و مام جەلال کتێبەکەی قانعی فەردی واژۆ نەکردووە".
لەکاتی بڵاوبوونەوەی ئەو بەرنامەیە ژمارەیەکی زۆر لە هاوڵاتیانی رۆژهەڵاتی کوردستان پەیوەندییان بە بەرنامەکەوە گرت و رایانگەیاند کە قانعی فەرد نوێنەرایەتی خەڵکی کورد ناکات و قسەکانی چەواشەکاری میژووی سیاسی کوردستانە.
رەحیم رەشیدی، ئەندامی رۆژنامەنووسانی نێودەوڵەتی لە ئەمریکا لە لێدوانێکدا بۆ (رووداو) رایگەیاند "قانعی فەرد لە روانگەی کۆماری ئیسلامی ئێرانەوە دەڕوانێتە پرسی کورد. ناوبراو نەتەنها زمانی کوردی نازانێت بەڵکو بەناو کوردەوە هەوڵی چەواشەکردنی مێژووی سیاسی کورد دەدات".
ماوەیەک لەمەو پێش، 65 شاعیر، نووسه‌ر، ئه‌ندامی پێشووی په‌رله‌مان، كه‌سایه‌تی سیاسی و چالاكڤانی مه‌ده‌نی رۆژهه‌ڵاتی كوردستان لە بەیاننامەیەکدا کە وێنەیەکی بۆ (رووداو) نێردرابوو، "شێواندنی مێژووی كوردستان" و "بێ رێزی" به كه‌سایه‌تییه سیاسی و مێژووییه‌كانی كورد به‌تایبه‌ت مه‌لا مسته‌فا بارزانی، له كتێبه‌كه‌ی قانعیفه‌رددا سه‌ركۆنه ده‌كرد.
ئەو کەسایەتییانەی رۆژهەڵاتی کوردستان مەبەستی قانعی فەردیان بۆ بێ بایه‌خ نیشاندانی كه‌سایه‌تییه مێژووییه‌كانی كورد و یاریكردن به مێژووی به‌رخۆدانی گه‌لی كورد زانی و داوایان لە ناوبراو کرد داوای لێبوردن لە خەڵکی کوردستان بکات.
وێنەکانی قانعی فەرد لەگەڵ سەرکردەکانی کوردستان
No comments:
Post a Comment