Archive

Friday, February 6, 2009

کۆچی دوایی مامه‌ قاله‌ ده‌باغی.

کۆچی دوایی مامه‌ قاله‌ ده‌باغی.
خه‌باتگێری نه‌سره‌وتووی رێگای کوردایه‌تی مامه‌ قاله‌ ده‌باغی له‌ یه‌کێک له‌ نه‌خۆشخانه‌کانی شاری له‌نده‌ن پێته‌ختی وڵاتی بریتانیا پاش ماوه‌یک به‌ربه‌ره‌کانێ له‌گه‌ڵ مه‌رگ، له‌ ته‌مه‌نی 88 سآڵی‌دا کۆچی دوایی کرد
عه‌بدولقادر ده‌باغی ئه‌و جوامێره‌ وره‌ به‌رزه‌ بوو که‌ سه‌ختی‌و دژواریه‌کانی خه‌بات‌، ته‌نگ‌وچه‌ڵه‌مکانی تێکۆشانی کوردایه‌تی‌‌و دێموکڕاسی خوازی، چۆکیان پێ دانه‌دا.
مام قاله‌ ده‌باغی، پێشمه‌رگه‌ی كۆماری كوردستان‌و ئه‌ندامی هه‌تا هه‌نووكه‌یی حیزبی دێمۆكراتی كوردستانی ئێران بو.
عه‌بدولقادر ده‌باغی ناسراو به‌ مامه‌ قاله‌، 1ی 1ی 1921 زایینی به‌رامبه‌ر به‌ 12ی‌ به‌فرانباری 1299ی‌ هه‌تاوی، له‌ شاری بانه‌ له‌ دایك بو.
پاشان چوونه‌ته‌ سه‌قز‌و له‌وێ بڕوانامه‌ی دواناوه‌ندی وه‌رگرتووه‌.
مامه‌ قاله‌ له‌ ته‌مه‌نی 19 ساڵیدا بوو به‌ ئه‌ندامی كۆمه‌ڵه‌ی ژێکاف‌و له‌ ده‌زگای راگه‌یاندنی كۆماردا بۆ بڵاڤۆكه‌كانی، گڕوگاڵی منداڵان، كوردستان‌و هاواری نیشتمان‌ وتاری نووسیوه‌.
مامه‌ قاله‌ پاش رووخانی كۆمار له‌گه‌ڵ یازده‌ 11 كه‌سی تر له‌ هاورێیانی گیراو كه‌وته‌ گرتووخانه‌ی رێژیمی په‌هله‌وی.
پاش ماوه‌یه‌كی كورت یازده‌ هاورێکه‌ی له‌ سێداره‌ دران، به‌ڵام مامه‌ قاله‌ به‌ دانی پووڵ‌و پاره‌یه‌كی زۆر پاش 19 مانگ ده‌ستبه‌سه‌ر بوون له‌ مه‌رگ رزگاری بوو.
ساڵی‌ 1327 جارێكی تر مامه‌ قاله‌ كه‌وته‌ گرتووخانه‌‌و 3 ساڵ دوور خستنه‌وه‌ بۆ بورازجانی به‌ سه‌ر دا سه‌پا، به‌ڵام دیسان به‌ خه‌رجیه‌كی زۆر‌و پووڵ‌و پاره‌ دان به‌ به‌رپرسانی په‌یوه‌ندیدار حكوكمه‌كه‌ی له‌ 3 ساڵ بۆ 1 ساڵ گیران‌‌و شوێنی زیندانیه‌كه‌شی له‌ بورازجانه‌وه‌ بۆ بوكان گۆڕدرا.
مامه‌ قاله‌ به‌ هۆی هه‌ڵسووڕان‌و تێكۆشانی ماندوونه‌ناسانه‌ی خۆی، پاش كۆنگره‌ی چواره‌می حیزب دێموکڕات وه‌كوو ئه‌ندامی راوێژكاری كومیته‌ی ناوه‌ندی ئه‌و حیزبه‌ هه‌ڵبژێردرا.
ناوبراو جگه‌ له‌ نووسین بۆ رۆژنامه‌ی كوردستان‌و رادێو ده‌نگی كوردستان له‌ بواری ئه‌ده‌بیشه‌وه‌ كتێبی حاجی ئاغای سادقی هیدایه‌تی بۆ سه‌ر زمانی كوردی وه‌رگێڕاوه‌‌و هه‌روه‌ها كتێبێكی به‌ ناوی راپه‌ڕینی كۆمه‌ڵه‌ی ژێكاف به‌ چاپ گه‌یاندووه‌. چه‌ند كتێبی دیكه‌ی ئاماده‌ی چاپ‌و بڵاوكردنه‌وه‌ن.
مامه‌ قاله‌ ده‌باغی له‌ ساڵی 1997ته‌وه‌ له‌ وڵاتی بریتانیا گیرساوه‌ته‌وه‌، به‌ داخه‌وه‌ رۆژی هه‌ینی 18ی‌ رێبه‌ندانی 1387ی هه‌تاوی، به‌رانبه‌ر به‌ 06 02 2009، ماڵئاوایی یه‌كجاری له‌ گه‌ل‌و نیشتمان كرد‌، مه‌رگ مه‌ودای نه‌دا بۆ جارێكی تر به‌ خاك‌و وڵاتی خۆی شاد بێته‌وه‌.
به‌رێوه‌به‌ران‌و کارگێرانی ته‌له‌ویزیۆنی نه‌ته‌وه‌یی کوردستان تیشک تی‌ڤی، به‌ بۆنه‌ی کۆچی نا به‌وه‌ختی خه‌باتگێری نه‌سره‌وتوو به‌ بیروباوه‌ڕی رێگای رزگاری کوردو کوردستان، پێشمه‌رگه‌ی به‌ وه‌فای کۆماری کوردستان‌، سوارچاکی هه‌تاسه‌ری رێبازی تژی له‌سه‌روه‌ری حیزبی دێموکراتی کوردستان، پرسه‌و سه‌ره‌خۆشی پێشکه‌ش به‌ خه‌ڵکی کوردستان به ‌گشتیی، شاری سه‌قز به‌ تایبه‌تی‌، هاوسه‌نگه‌ران‌و بنه‌ماڵه‌ی به‌رێزی مامه‌ قاله‌ ده‌باغی ده‌کات‌و خۆی له‌ غه‌م‌و په‌ژاره‌یان‌دا به‌ شه‌ریک‌و به‌شدار ده‌زانێت
رۆحی شادو رێگای پڕ له‌ شانازی مامه‌ قاله‌ پڕ رێبوار بێت.

No comments: