Archive

Monday, July 11, 2011

به‌رێوه‌چوونی هه‌شته‌مین فێستیڤاڵی به‌درخان له‌ پاریس

ره‌حیم ره‌شیدی - پاریس
رۆژانی شه‌ممه‌و یه‌کشه‌ممه‌، رێکه‌وتی 9‌و 10ی مانی جولای 2011، هه‌شته‌مین فێستیڤاڵی به‌درخان له‌ ژێر دوروشمی "له‌ کوردستانەوە بۆ پاریس، دروستکردنى پردى رووناکبیرى لە نێوان کوردو فەرانسه‌وییه‌کان، کولتوور ناسنامه‌ی گه‌لانه‌، له‌ هوتێل نۆڤۆتێل له‌ ناوچه‌ی سیڤه‌ر له‌ شاری پاریس پێته‌ختی فه‌رانسه‌ به‌ڕێوه‌چوو.

له رێوڕه‌سمی کردنه‌وه‌ی فێستیڤاڵه‌‌دا د.ئازاد حه‌مه‌شریف‌و د.جۆیس بلۆ قسه‌یان کرد. دوای پێشكه‌ش كردنی سرودی به‌درخانی خاك په‌روه‌ر، خاتوو خه‌مان زرار نوێنه‌ری حكومه‌تی هه‌رێمی كوردستان له‌ فه‌رانسه‌، وتارێكی پێشكه‌ش كرد.
پاشان نوێنه‌ری خاتوو سینه‌م به‌درخان سه‌باره‌ت به‌ مێژووی بنه‌ماڵه‌ی به‌درخانییه‌کان‌و رۆڵ‌و كاریگه‌رییان له‌ مه‌یدانی ئازادیی‌و رزگاربوونی كورد له‌ ژێر ده‌سه‌ڵاتی عوسمانییه‌كان قسه‌ی كرد.
دواتر حه‌مید به‌درخان سه‌رۆكی ئه‌نجومه‌نی ده‌زگای به‌درخان وتارێكی خوێنده‌وه، هه‌روه‌ها ‌مسیۆ جاك بلۆندان شاره‌وانی سیڤه‌ره‌و راوێژكاری مسیۆ فرانسۆ هولاندا، وتارێكی پێشكه‌ش كرد.
ئینجا دوکتۆر كه‌نداڵ نه‌زان سه‌رۆكی ئه‌نستیتۆی كورد له‌ پاریس وتارێكی پێشكه‌ش کرد.
دواتر د.هیمداد حسێن ئه‌ندامی ده‌سته‌ی به‌ڕێوه‌به‌ری یه‌كیه‌تیی نوسه‌رانی كورد وتارێكی به‌ نوێنه‌رایه‌تی ده‌سته‌ی به‌ڕێوه‌به‌ر خوێنده‌وه.
ئینجا فیلمی ئێره‌ كوردستانه‌ كه‌ فیلمێكی دۆكیومێنتاری بوو له‌سه‌ر کوردستان، به‌ زمانی فه‌رانسه‌وی‌ له‌ ده‌رهێنانی هه‌وراز محه‌مه‌د، پیشان درا.
دواتر پیشانگای كتێب‌و فۆتۆگرافیی هونه‌رمه‌ندان هێمن جه‌میل‌، نامیق عه‌لی قادرو محه‌مه‌د فه‌تاح‌ كه‌ نیشاندانی كولتووری كورد بوو له‌ لایه‌ن ئاماده‌بووانه‌وه‌ به‌سه‌ر کرایه‌وه‌.
پاش نیوه‌ڕۆی هه‌مان رۆژ له‌ دوو كۆڕی دوا به‌دوای یه‌كدا مالمیسانژ، ئیبراهیم سه‌یدۆ، به‌نگین حاجۆو د.كورد جه‌مشید به‌درخان له‌سه‌ر رۆژنامه‌ی کوردستان‌و ده‌وری بنه‌ماڵه‌ی به‌درخانییه‌کان له‌م بواره‌دا قسه‌یان کرد. ئه‌م کوڕه‌ له‌ لایه‌ن دوکتۆر لوئیی جافه‌وه‌ به‌ڕێوه‌ چوو.


له‌ كۆڕی دووه‌هه‌میشدا، که‌ دوکتۆر جه‌نات عه‌بدوڵا به‌ڕێوه‌ی ده‌برد، رۆژنامه‌گه‌ری له‌ ئه‌مڕۆداو كاریگه‌ری ته‌كنه‌لۆژی‌و میدیا باس كران، كه‌ تیایدا رۆژنامه‌وانان كاروان ئه‌نوه‌ر، ئومێد عه‌لی، به‌هات حه‌سیب قه‌ره‌داغی‌، ره‌حیم ره‌شیدی‌و ئه‌فرام یوسف به‌شدارییان كرد.
له‌ رۆژی دووه‌می فێستیڤاڵدا، سه‌ره‌تا عه‌بدول له‌تیف گلی وتارێكی له‌ باره‌ی په‌یوه‌ندی نێوان نه‌ته‌وه‌ی كوردو فه‌رانسه‌ پێشكه‌ش كرد.
پاشان فیلمی دیكۆمێنتاریی دایكی كورد له‌ باره‌ی خاتوو دانیال میترانه‌وه‌ له‌ ده‌رهێنانی ستار محه‌مه‌د ئه‌مین نیشان درا.
له‌ دیوانی دواتردا، نووسه‌ران مسته‌فا ساڵح كه‌ریم، محه‌مه‌د موكری، شێرزاد حه‌سه‌ن، ئه‌حمه‌د محه‌مه‌د ئیسماعیل‌و فه‌واز حسێن باسی ئه‌زموونی نووسینی خۆیان له‌ بواری چیرۆك‌و رۆمان‌دا كرد.
ئه‌وجار شاعیران چنار نامیق، چنور نامیق، به‌یان سه‌لمان، گۆران زه‌وقه‌، دڵزار حه‌سه‌ن‌و ناهید ره‌شیدیان شێعریان خوێنده‌وه.‌
پاشان فیلمی دیكۆمێنتاریی مۆنۆمێنتی شه‌هیدانی كوردستان له‌ ئاماده‌ كردنی به‌رێز خوسره‌و جاف پیشان درا.


دوای ئه‌مه‌، له‌ ژێر ناونیشانی گه‌ڕۆكه‌ فه‌رانسه‌وییه‌کان له‌ كوردستان ئۆلیڤێی رواو میكایل تێڤینه‌ دوو بابه‌تیان له‌ بواری شوێنه‌وارو شوێنه‌وارناسی پێشكه‌ش كرد که‌ د.نه‌جاتی عه‌بدوڵلاوه‌ قسه‌کانی له‌ فه‌رانسه‌وییه‌وه‌ بۆ کوردی وه‌رده‌گێڕان.
له‌ پانێلی پێنجه‌مدا باس گه‌لێک له‌ ژێر ناونیشانی كوردستان په‌نجه‌ره‌یه‌ك به‌سه‌ر دونیادا له‌ لایه‌ن عه‌دنان موفتی‌، د.خه‌سرۆ عه‌بدوڵایی، حسێن یه‌زدان په‌نا، خالید عیسا، ئۆفرا بنگیوم‌و د. ئازاد حه‌مه‌ شه‌ریف پێشكه‌ش كران. ئه‌م پانێله‌ له‌ لایه‌ن بارزان فه‌ره‌جه‌وه‌ به‌ڕێوه‌ برا.
له‌ ته‌وه‌ری شه‌شه‌م‌دا ره‌وشی ژن له‌ كۆمه‌ڵگه‌ی كورده‌واری‌دا باسی لێکرا له‌ تێیدا د. شوكریه‌ ره‌سوڵ، فریاڵ حاجۆ ، شیلان شۆڕش، نه‌هله‌ سه‌عدوڵڵاو په‌ری شێخ ساڵح قسه‌یان تێدا کرد.
دوایین بڕگه‌ی فێستیڤاڵ به‌ ناونیشانی گۆرانی، مۆسیقاو به‌سه‌رهاتی هونه‌ری بۆ هونه‌رمه‌ندان هۆمه‌ری دزه‌یی، ئه‌نوه‌ر قه‌ره‌داغی‌و عه‌دنان عه‌فرینی به‌ڕێوه‌چوو كه‌ تیایدا باس له‌ ره‌وشی مۆسیقاو هونه‌ری ره‌سه‌نی كوردی كرا.
واژۆی كتێبی تایبه‌ت به‌ هه‌شته‌مین فێستیڤاڵی به‌درخان له‌ پاریس رۆمانی "ئه‌وین له‌ وڵاتێكی له‌ت له‌تكراودا" له‌ نوسینی جین ساسۆس، که‌ له‌ ‌لایه‌ن ئازاد حه‌مه‌ شه‌ریف وه‌رگێڕدرابوو له‌گه‌ڵ خه‌ڵاتی رێزلێنان به‌ چه‌ند ناوه‌ند، رێكخراوو كه‌سایه‌تی كوردو فه‌رانسه‌وی بوو.


هه‌روه‌ها بڕوانامه‌ی رێزلێنان درا به‌ هه‌موو ئه‌و میوانانه‌ی كه‌ له‌ كوردستانه‌وه‌ هاتبوون.
هاوکات پێشنیار كرا فێستیڤاڵی به‌درخان که‌ له‌ ساڵی 2004 به‌ دواوه‌، له‌ سلێمانی، دهۆك. هه‌ولێر، برلین، قاهیره‌، ئاتێن‌، واشینگتۆن‌و پاریس به‌رێوه‌ چوه‌، هه‌ر سێ ساڵ جارێک ساز بدرێت.
له‌ كۆتایی‌دا، هونه‌رمه‌ندان هۆمه‌ری دزه‌یی، عه‌دنان عفرینی، رۆژیداو شیلان عه‌بدوڵڵایی كۆڕی به‌زم‌و گۆرانییان گه‌رم كرد.

No comments: