- په‌یامی ڕه‌حیم ڕه‌شیدی بۆ کۆنگره‌ی پێنجه‌می لاوان
به‌شدارانی به‌رێزی کۆنگره!
خۆشه‌ویستانی به‌شداری پێنجه‌مین کۆنگره‌ی یه‌کیه‌تیی لاوانی دێموکڕاتی کوردستانی ئێران!
له رێگای دووره‌وه ده‌ستی یه‌که به یه‌که‌تان پڕ له گوڵ ده‌گوشم، ئاواتم ئه‌وه‌یه کۆنگره‌ی پێنجی رێکخراوی یه‌کیه‌تیی لاوان هه‌نگاوێکی گه‌وره بێ له به‌ره‌وپێش بردنی کاروباری ئه‌و رێکخراوه‌دا که ئه‌مرۆ به هه‌زاران لاوی نیشتمانپه‌روه‌ری کوردی له ده‌وری باوه‌ڕو ئامانجه مرۆیی‌و دێموکڕاتییه‌‌کانی کۆ کردۆته‌وه، کوڕان‌و کچانی ئازادیخوازی کورد کردویانه‌ته مه‌یدانێک تاکوو له‌و رێگاوه تواناکانیان بۆ گه‌یشتن به ژیانێکی باشتر وه‌سه‌ریه‌ک بخه‌ن، باندۆڕو کاریگه‌ریان پترو جێ په‌نجه‌یان له ڕه‌وتی ڕووداوه‌کان‌دا دیارو به‌رچاوتر بێ.
گومانی تێدا نیه کۆنگره بۆ ژیانی سیاسیی‌و به‌رێوه‌به‌رایه‌تی هه‌موو رێکخراوێکی دێموکڕاتیک پێویستییه‌کی حاشا هه‌ڵنه‌گره، ئه‌م پێویستییه له‌و ڕوانگه‌وه زۆرتر خۆ ده‌رده‌خات که په‌روه‌رده‌ی زۆربه‌ی تاکه‌کانی مه له ژێر سێبه‌ری ده‌سه‌ڵاتێکی نادێموکڕات‌دا مسۆگه‌ر ده‌بێ، که‌وایه کارو ئه‌رکی ئێوه بۆ بره‌ودان به پرسه دێموکڕاتیکه‌کان دژواره‌و نابێ له‌م به‌ستێنه‌دا به هیچ چه‌شنێک ماندوو هیوا بڕوا بن، له ڕاستی‌دا هه‌ر ئه‌مه‌ش تێکۆشانی ئێوه له‌م قۆناغه‌دا به‌نرختر ده‌کات.
له‌م سۆنگه‌وه، ده‌گه‌ینه ئه‌و ده‌ره‌نجامه که خه‌بات‌و کاری هه‌مووان له یه‌کیه‌تیی لاوان‌دا له‌گه‌ڵ ئه‌وه‌ی شانازییه‌کی مه‌زنه، بێ گومان بێ گرێ‌وگۆڵ‌و ئاسته‌نگ نه‌بوه‌و نابێ. به‌ڵام کاری هه‌ره وه‌زی‌و به‌کۆمه‌ڵ، که‌سایه‌تی مرۆڤ به‌هێزتر ده‌کات، وره‌ی وی بۆ ڕاوه‌ستان له ئاست دژوارییه‌کان‌دا بره‌و پێده‌دات. له‌وه‌ش دڵنیام ئه‌گه‌ر مرۆڤ له‌م رێره‌ودا پابه‌ند به یاسا سه‌روه‌ری‌و پێوانه دێموکڕاتیکه‌کانی رێکخراو نه‌بێ ڕه‌نج به خه‌سار ده‌مێنێته‌وه.
ئێوه‌ی به‌رێز باش ده‌زانن پێکهاتنی کۆنگره بۆ رێکخراوێکی وه‌کوو لاوان به‌و ئاسته به‌رچاوه له تێکۆشان ناتوانێ ته‌نیا کۆبوونه‌وی نوێنه‌رانی شانه‌‌و کۆمیته‌‌کانی لاوان بێ، زۆر گرینگه هه‌مووان ئه‌و ڕاستییه به باشی تێبگه‌ن که کۆنگره له ژیانی رێکخراوێکی دێموکڕاتیک‌دا پێناسه‌‌و مانایه‌کی به‌رینتر له‌وه هه‌ڵده‌گرێ، که‌واته ده‌بێ سه‌رجه‌م به‌شدارانی به‌رێزی "کۆنگره‌ی ئۆگرانی رێبازی قاسملوو" هه‌ست به به‌رپرسایه‌تیی ته‌واو بکه‌ن، شێلگیرانه له باس‌وخواسته‌کانی کۆنگره‌دا به‌شداری بکه‌ن، ئه‌وه بزانن که هه‌موو لایه‌ک چاوه‌ڕوانن کۆنگره به سه‌رکه‌وتنه‌وه به ئاکامی دڵخواز بگات، گومانی تێدا نیه ئێوه که متمانه‌ی رێکخستنه‌کانی لاوانتان بۆ نوێنه‌رایتی له کۆنگره‌دا پێ دراوه هه‌ر ئه‌و چاوه‌ڕوانیه‌تان لێ ده‌کرێ که موژده‌ی سهرکهوتنی کۆنگره‌مان به هه‌موو لایه‌ک ڕابگه‌یه‌نن.
خۆشه‌ویستان!
هیوا ده‌خوازم ئێوه نوێنه‌رانی کۆنگره‌ی پێنجه‌م، به باس‌و خواستی گه‌رم‌وگوڕو به‌رپرسانه بۆ گه‌شه‌‌و پێشڤه‌چوونی زێده‌تری رێکخراوه، کۆنگره بکه‌نه مه‌یدانی هه‌ڵسه‌نگاندنی کاروچاکی دوو ساڵێ به‌رێ، له‌م پێوه‌ندییه‌دا ئه‌و ڕاستییه له‌به‌رچاو بگرن که ئه‌رکی ئێوه‌یه که‌م‌وکورتییه‌کان، کێشه ته‌شکیلاتییه‌کان، جێبه‌جێ نه‌بوونی ئه‌و کارو پرۆژانه‌ی ده‌با له ماوه‌ی ئه‌و دوو ساڵه‌دا جێبه‌جێ بووبان، که‌ندوکۆسپه‌کانی ئه‌و سه‌رنه‌که‌وتنانه به باس‌و ڕاوێژ ده‌ست نیشان بکه‌ن‌و میکانیزم‌و رێگا چاره‌ی پێوسیت بۆ پاته نه‌بوونیان به داڕشتنی یاسای گونجاو که له‌گه‌ڵ بارودۆخی ژیانی سیاسی، کۆمه‌ڵایه‌تی رێکخراوه‌که له دوورو نزیک یه‌کبگرێته‌وه دابڕێژن‌و له‌م به‌ستێنه‌دا هه‌موو توانای خۆتان بخه‌نه گه‌ڕ.
به‌شدارانی هێژا!
ئاشکرایه نابێ ئه‌وه له بیر بکه‌ن که له ماوه‌ی دوو ساڵی ڕابردوودا، سه‌ره‌ڕای هه‌موو کێشه، ته‌نگه‌وچه‌ڵه‌مه، ده‌ستکورتی‌و نه‌بوونی پشتیوانیه‌کی به‌هێزی ماڵی، یه‌کیته‌تی لاوان وه‌کوو رێکخراوێکی به‌هێزو شکۆمه‌ند تێکۆشاوه‌و هه‌ڵسووڕانی خۆی گه‌شه پێداوه، له‌م پێوه‌ندییه‌دا پێویسته ماندوو نه‌بوونی به هه‌مووان بڵێن‌و سوپاس له سه‌رجه‌م ئه‌و ئازیزانه بکه‌ین که‌م‌وزۆر یارمه‌تیان به به‌ره‌وپێشه‌وه چوونی تێکۆشانی ئه‌و رێکخراوه کردوه‌و ده‌یکه‌ن. به‌ڵام هه‌مووتان له‌وه‌دا له‌گه‌ڵم هاوڕان که وزه‌و هێزی لاوان بۆ کارو تێکۆشان زۆر له‌وه پتره که ئێستا هه‌یه، که‌وایه ده‌بێ‌و ده‌کرێ که بازنه‌ی تێکۆشانه‌که به‌رینتر بکه‌ینه‌وه‌و به ئه‌رکدار کردنی که‌سانی کار له ده‌ست هاتوو به‌ئه‌زموونی رێکخراوه هه‌مووان زۆرترو زیاتر بۆ سهرکهوتنی ئه‌و رێکخراوه تواناکانیان وه‌گه‌ڕ بخه‌ن.
ئێوه ده‌بێ شایی به‌خۆتر له هه‌میشه ببینه گه‌رووی پڕ له هاواری ئێستای ئه‌و کچ‌و کوڕه دڵێرانه‌ی که له نێو جه‌رگه‌ی خه‌باتی به کرده‌وه‌دا تێده‌کۆشن، ده‌بێ به تێکۆشان، بۆ وان هیوا خولقێن بن، هاوکات به له‌قاودانی ره‌فتاری نه‌شیاو سیاسه‌تی سه‌رکوتکه‌رانه‌ی ده‌سه‌ڵاتدارانی تاران له هه‌مبه‌ر لاوانی وڵاته‌که‌مان، له کۆڕو کۆبوونه‌وه‌ی نێونه‌ته‌وه‌یی‌دا، ئه‌و هه‌سته له‌واندا قوڵتر بکه‌یه‌نه‌وه که خه‌باتی شارو شاخ، ته‌واوکه‌ری یه‌کترن.
دۆستانی به‌رێز!
له هه‌لومه‌رجێک‌دا که کۆماری ئیسلامی تێده‌کۆشی هه‌رچی به‌رانبه‌ری، جوانی، سه‌فاو شادییه هه‌ڵوشێ، رێکخراوی لاوان ده‌بێ به کرده‌وه‌و له هه‌موو بواره‌کان‌دا له خاڵی به‌رانبه‌ر به‌و ده‌سه‌ڵاته جه‌هه‌نده‌میه‌دا ڕاوه‌ستێ، ئه‌گه‌ر له‌و کۆمه‌ڵگادا ژنان‌و کچان ده‌چه‌وسێنه‌وه‌و سته‌میان پێ ڕه‌وا ده‌بیندرێ، ده‌بێ بێ ئه‌ملاولا له تێکۆشانی لاوان‌دا چووکترین بوار بۆ هاتنه ئارای ئه‌و دیاردانه نه‌هێڵنه‌وه. بواره‌کانی سه‌رکه‌وتن‌و گه‌شه هه‌رچه‌نده لیخن‌و ناهه‌مووار بن، به پاڵوێکدان‌و داڕشتنی به‌رنامه‌ی دورست که له‌گه‌ڵ ڕاستییه‌کان‌دا یه‌کبگرێته‌وه، ده‌کارن به سه‌رکه‌وتنه‌وه بپێوین‌و به‌سه‌ر که‌ندو کۆسپه‌کان‌دا زاڵ بن.
جارێکی دیکه ماندوو نه‌بوونیتان پێ ده‌ڵێم‌و ئاواتی کۆنگره‌یه‌کی پڕ ده‌سکه‌وتان بۆ ده‌خوازم، به‌داخم که به هۆی کارو ئه‌رکی زۆری رۆژانه هه‌ر ئێستا له‌گه‌ڵتان نیم، به‌ڵام ئه‌گه‌ر به‌مه‌ودا لێتان دوورم، ئه‌وا به دڵ لێتان نزیک‌و له‌‌گه‌ڵتانم.
جوانترین ئاواته‌کانم بۆ ئێوه.
سه‌که‌وتوو بێ کۆنگره‌ی پێنجه‌می یه‌کیه‌تیی لاوانی دێموکڕاتی کوردستانی ئێران
دۆست‌و هاوڕێتان
ره‌حیم ره‌شیدی
پاریس
20 07 2009
29ی پووشپه‌ڕی 88
Sunday, July 26, 2009
په‌یام بۆ کۆنگره‌ی پێنجه‌می لاوان
Subscribe to:
Post Comments (Atom)
No comments:
Post a Comment