Archive

Wednesday, March 4, 2009

مانگرتنی به‌رینی خه‌ڵکی مه‌ریوان



سیخوڕو کاربه‌ده‌ستانی کۆماری ئیسلامی ئێران له‌ شاری مه‌ریوان تێده‌کۆشن مانگرتنی‌ جه‌ماوه‌ریی‌ ئه‌و شاره‌ به‌ره‌و توند‌وتیژی‌ ببه‌ن که‌ ماوه‌ی سێ رۆژه‌ به‌رده‌وامه‌.
ئه‌مڕۆ چوارشه‌ممه‌، 14ی‌ ره‌شه‌مه ‌مانگرتنی‌ به‌رینی‌ خه‌ڵكی‌ مه‌ریوان دژی‌ داخستنی‌ سنووره‌كان، هه‌ژاری‌‌و بێكاری‌ پێنایه‌ سێهه‌مین رۆژه‌وه‌
له‌ ده‌سپێكی‌ مانگرتنه‌كه‌وه‌ ده‌ستوپێوه‌ندکانی رێژیم خۆیان‌ بۆ سه‌ركوتی‌ مانگرتنی‌ به‌رینی‌ دووكاندار‌و بازاڕییه‌كان‌و خۆپیشاندانی‌ هێمنانه‌ی‌ خه‌ڵكی‌ مه‌ریوان مڵاس‌ دابوو، هه‌ر له‌م به‌ستێنه‌دا ئه‌وان له‌ هه‌وڵی ئه‌وه‌دان‌ مانگرتنه‌كه‌ به‌ره‌و توند‌وتیژی‌ به‌رن
تا ئێستا نزیكه‌ی‌ 10 تا 15 كه‌س له‌ به‌شدارانی‌ ئه‌م مانگرتنه‌ له‌ لایه‌ن هێزه‌كانی‌ رێژیمه‌وه‌ ده‌ستبه‌سه‌ر كراون.
سه‌ره‌ڕای‌ پیلانه‌كانی‌ رێژیم‌و هه‌ڕه‌شه‌ی‌ هێزه‌ ئه‌منییه‌تی‌‌و ئینتیزامییه‌كان، خه‌ڵكی‌ مه‌ریوان له‌سه‌ر درێژه‌دان مانگرتن بۆ گه‌یشتن به‌ داخوازییه‌ ره‌واكانیان پێداگرن.
جه‌ماوه‌ری‌ مانگرتووی‌ مه‌ریوان هه‌روه‌ها بڕیاریان داوه‌، وێڕای‌ درێژه‌دان به‌ داخستنی‌ دووكان‌و بازاڕه‌كان‌و خۆپیشاندانی‌ هێمن له‌ ئه‌گه‌ری‌ به‌ڕێوه‌نه‌چوونی‌ داخوازییه‌كانیاندا، له‌ رێوڕه‌سمی‌ نوێژی‌ جومعه‌ی‌ رۆژی‌ هه‌ینی‌دا به‌شداری‌ نه‌که‌ن.
شایانی‌ باسه‌ له‌ رۆژی‌ یه‌كه‌می‌ مانگرتنه‌كه‌دا، فه‌رمانداری‌ مه‌ریوان ویستی‌ به‌ دانی‌ واده‌‌و به‌ڵێنیی‌ درۆ، خه‌ڵك له‌ درێژه‌دان به‌ داخستنی‌ دووكان‌و بازاڕه‌كان‌و خۆپیشاندانی‌ ئاشتیخوازانه‌ پاشگه‌ز بكاته‌وه‌
هه‌روه‌ها رێژیم له‌ رێگه‌ی‌ یه‌کیه‌تیی‌ كار‌وباری‌ سێنفییه‌وه‌ گوشاری‌ بۆ سه‌ر خاوه‌ن دووكان‌و پاساژه‌كان هێناوه‌ تا دووكان‌و بازاڕه‌كان بكه‌نه‌وه‌، به‌ڵام مانگرتووان تا ئێستا ملكه‌چی‌ گوشار‌و به‌ڵێنییه‌كانی‌ هێزه‌ سه‌ركوتكه‌ره‌كانی‌ رێژیم‌و به‌رپرسانی‌ پێوه‌ندیدار نه‌بوون
به‌ پێی‌ دوایین هه‌واڵه‌كان، رێژیم ده‌یه‌وێ‌ به‌ پێكهێنانی‌ كه‌ش‌وهه‌وای‌ حكوومه‌ت نیزامی‌‌و ده‌ستبه‌سه‌ركردنی‌ ژماره‌یه‌ك له‌ مانگرتووان، مانگرتنی‌ به‌رین‌و خۆپیشاندانی‌ هێمنی‌ خه‌ڵكی‌ مه‌ریوان به‌ره‌و توند‌وتیژی‌ ببات‌و له‌م رێگه‌یه‌وه‌ بوار بۆ سه‌ركوتی‌ مانگرتنه‌كه‌ خۆش بكات
هه‌ر له‌م پێوه‌ندیه‌دا ناوه‌ندی خه‌به‌ری حدکا له‌ هه‌واڵێدا ئاشکرای کرد، ئه‌مرۆ هێزه‌ چه‌کداره‌کانی ریژیم هه‌وڵیان داوه‌ که‌ دووکان و بازار به‌ خه‌ڵک بکه‌نه‌وه‌و له‌و نێوه‌دا به‌ هه‌ره‌شه‌ کردن له‌ چواررێیانی بایوه‌ هه‌ڕه‌شه‌یان له‌ پاسه‌وانانی پاساژگه‌لی، ئاوێنه‌، ئه‌مینی‌و مه‌لوودی کردوه‌ که‌ دوکانه‌کان بکه‌نه‌وه‌ ده‌نا ده‌سبه‌سه‌ر ده‌کرێن.
هاوکات خه‌لکی مه‌ریوان له‌سه‌ر ئه‌وه‌ ساغ بوونه‌ته‌وه‌ که‌ رۆژی هه‌ینی له‌ مه‌یدانی شه‌بره‌نگ کۆببنه‌وه‌و به‌ره‌و فه‌رمانداری بکه‌ونه‌ رێ‌و له‌سه‌ر دابین بوونی ویسته‌کانیان پێداگری بکه‌ن

No comments: