Archive

Sunday, March 15, 2009

Slumdog Millionaire

له‌سه‌ر ته‌خته‌که‌م ڕاکشاوم، چراکانمان کوژاندۆته‌وه‌، دوێنێ "میلیۆننێڕی زاغه‌نشین"، ئه‌و فیلمه‌ی خه‌ڵاتی ئۆسکاری بۆ خۆی ده‌ستبه‌ر کرد، چاو لێ ده‌که‌ین.
پێشتر هێندێکم له‌سه‌ر خوێندۆته‌وه‌و له‌ ئابوونمانی مانگانه‌شمان له‌ هه‌واڵده‌ری ڕۆیتێرز، بڕێک له‌ دیمه‌نه‌کانیم دیوه‌...
ڕه‌خنه‌گرانی سینه‌مایی هێند تاکوو ئه‌و ڕاده‌یه‌ چوونه‌ پێش که‌ پێکهێنه‌رانی سه‌ره‌کی فیلمه‌که‌یان‌ به‌ سه‌گ ناو برد، بیانووشیان بۆ ئه‌و کاره‌ ئه‌وه‌ بو‌ کاتی خۆی بریتانیاییه‌کان که‌ هێندیان داگیر کردبو خه‌ڵکی ئه‌و وڵاته‌یان به‌ سه‌گ ده‌زانی، بۆ ده‌بێ پاش تێپه‌ڕینی 60 ساڵ له‌ سه‌ربه‌خۆیی هێندو قوتار بوونی له‌ ده‌ست بریتانییه‌کان دیسان ئه‌وان منداڵانی هه‌ژاری ئه‌و وڵاته‌ به‌ سه‌گ بزانن...؟!
دوو برا به‌ ناوه‌کانی جه‌ماڵ مه‌لیک‌و سه‌لیم وێرای کچێک به‌ ناوی له‌تیکا هه‌موو گرێچنی فیلمه‌که‌یان پێکهێناوه‌...
ته‌نانه‌ت ئه‌وانه‌ی زمانی فیلمه‌که‌ش نه‌زانن ده‌توانن به‌ لێوردبونه‌وه‌ له‌ دیمه‌نه‌کانی ئه‌و فیلمه‌، قوڵایی چیرۆکی فیلمه‌که‌و ئه‌و ئامانجه‌ی ده‌رهێنه‌ره‌که‌ی به‌دواوه‌یه‌تی به‌ پێی مه‌وداکانی بیرکردنه‌وه‌ی خۆیان تێبگه‌ن...
هه‌ژاری ئه‌و مۆته‌که‌یه‌ بوارێکی به‌رین بۆ چالاکی تاقمه‌ مافیاییه‌کان ده‌خولقێنێ‌، ئه‌وان له‌ به‌ستێنی نه‌داری‌و ده‌ست کورتی ئه‌و خه‌ڵکانه‌ی له‌ "بمبه‌ئی" له‌ نێو ته‌نکه‌دا ژیان به‌ کوله‌ مه‌رگی تێپه‌ڕ ده‌که‌ن، بۆ گه‌یشتن به‌ ئامانجه‌کانیان، چاوچنۆک، بێ به‌زه‌یی‌و تاوانکارانه‌ منداڵه‌کان به‌ره‌و دونیایه‌کی ترسناک‌ پاڵ پێوه‌ده‌نێن، فێری دز‌ی‌و سواڵکردنیان ده‌که‌ن، ته‌نانه‌ت چاوێکیان کوێر ده‌که‌ن بۆ ئه‌وه‌ی رێبواره‌کان لێره‌و له‌وێ به‌زه‌یان به‌و زارۆکه‌ بێده‌ره‌تانانه‌دا بێته‌وه‌‌و ده‌ستیان بگرن.
ئه‌وان، له‌ گێژه‌نی ئه‌و ڕه‌وته‌ دڵته‌زێنه‌دا مه‌زن ده‌بن، نه‌شونما ده‌که‌ن‌و له‌ جه‌وهه‌ری خۆیان‌دا ده‌بنه‌ قوربانی گه‌وره‌تر، ئه‌خرێنه‌ بازاڕی له‌ش فرۆشییه‌وه‌، ڕوونه‌ که‌ له‌ تووله‌ رێی ئه‌م ڕیگایه‌دا بێ به‌زه‌یی ده‌بن‌، به‌ ئاقارێکی دیکه‌دا هه‌مان ئه‌و قوڕه‌ ده‌شێلنه‌وه‌ که‌ به‌ منداڵی بۆ خۆیان گیرۆده‌ی کراون.
ئه‌وان، بۆ ئه‌وه‌ی نیشان بده‌ن که‌سێکن، له‌غاوی ئه‌سپی سه‌رشێتی شل ده‌که‌ن، منداڵه‌کان تووشی هه‌مان قوڕ وه‌سه‌ری ده‌که‌نه‌وه‌ که‌ خۆیان هه‌موو هه‌وڵێکیان ده‌دا لێی ده‌رباز ببن!
لێره‌وه‌ چیرۆکی پڕ له‌ کاره‌ساتی ژیانی جه‌ماڵ‌و سه‌لیم‌ ده‌ست پێ ده‌کات، ئه‌وان به‌راستی له‌گه‌ڵ ژیان شه‌ڕ ده‌که‌ن‌ بۆ ئه‌وه‌ی بمێنه‌وه‌، به‌ڵام هه‌ر ئه‌و دژواریه‌ش فێری دۆزینه‌وه‌ی زۆر رێگا چاره‌یان ده‌کات بۆ ئه‌وه‌ی له‌ ژیان به‌رده‌وام بن، بۆ ئه‌وه‌ی به‌ گژ بێ ڕه‌حمیه‌کاندا بچنه‌وه‌، دوو چاره‌نووسی جیاواز که‌ هه‌ر یه‌ک هه‌ڵگری په‌یامێکی تایبه‌ته‌، ئاکامی ژیانی جه‌ماڵ‌و سلیمی به‌رایه‌تی، سه‌لیم که‌ به ‌ڕواڵه‌ت ژیانێکی باشی هه‌یه‌و ده‌ستی به‌ ده‌می خۆی ده‌گات، که‌چی ده‌گاته‌ بۆشایی‌و کۆتایی به‌ ژیانی دێنێ، له‌ حالێک‌دا جه‌ماڵ له‌گه‌ڵ ژیان شه‌ڕ ده‌کات بۆ مانه‌وه‌، ئه‌وه‌ شته‌ش که‌ واده‌کات جه‌مال تاقه‌ت بێنێ، ئه‌وینێکی دوره‌ ده‌سته‌ که‌ جه‌ماڵ له‌ سه‌ربه‌رزی‌دا ده‌یگاتێ...
ئه‌م بڕگه‌یه‌ له‌ فیلمه‌که‌، یانی ئه‌وه‌ی که‌ ژیان شتێک نیه‌ جیا له‌ شه‌ڕێکی به‌رده‌وام بۆ زیندوو مانه‌وه‌...
ده‌رهێنه‌ر، به‌و په‌ڕی لێهاتوییه‌وه‌، ده‌مارگرژی، ڕۆڵی ئائیه‌نه‌کان بۆ قوڵترکردنه‌وه‌ی دژبه‌ری‌و دوژمنایه‌تی له‌ نێوان مرۆڤه‌کان‌دا، ئه‌وین، قین، سۆزو به‌زه‌یی، توڕه‌یی‌و هێمنایه‌تیی‌، ئۆگری‌و پشوو درێژی وێرای زۆر شتی دیکه‌ له‌و فیلمه‌دا پێکه‌وه‌ کۆ کردۆته‌وه‌،‌ بێ ئه‌وه‌ی هیچ ڕۆڵێک زیادی‌و له‌خۆڕا به‌رچاو بکه‌وێ، بێ ئه‌وه‌ی سه‌ره‌داوی ڕووداوه‌کان له‌ پێش چاوه‌کانمان بزر ببن...
ڕووداوه‌کانی نێو ئه‌م فیلمه‌ هه‌لگری په‌یامگه‌لێکی گرینگن، ئه‌و ڕاستییه‌ ڕوون ده‌که‌نه‌وه‌ که‌ به‌ بێ بوونی زگی تێر، هیچ یاساو پێوانه‌یه‌ک وه‌کوو پێویست به‌رێوه‌ ناچێ. دێموکڕاسی له‌ کۆمه‌لگایه‌کی برسی‌دا یانی ئاسنی سارد کوتان، یانی چاوه‌ڕوانی گه‌یشتنه‌ گوڵزار له‌ بیابانێکی به‌ره‌هووتدا بۆ بۆن کردنی گوڵ. پۆڵیس له‌ کۆمه‌ڵگای داخراودا، نه‌ک پارێزه‌ری ئازادی‌ نیه‌، به‌ڵکوو هێزی داپڵۆسین‌، تاڵان‌و سڕ کردنی ڕاستیه‌کانه‌...
خاڵی هه‌ره‌ سه‌ره‌کی فیلمه‌که‌ به‌ لای منه‌وه‌، هێزی ئه‌و ئه‌وینه‌یه‌ که‌ له‌ هه‌ناوی جه‌ماڵ‌‌دا ڕه‌گی داکوتاوه‌، ئه‌وینێکی بێ گرێ‌وگۆڵ که‌ ناوبراو ده‌گه‌یه‌نێته‌ ترۆپکی سه‌رکه‌وتن، هێزو وزه‌یه‌ک که‌ سنووره‌ به‌رینه‌کانی ده‌مارگرژی‌ ده‌به‌زێنێ‌و له‌ ئاکام‌دا خۆشه‌ویستی ده‌یباته‌وه‌....
خه‌ڵکی شاری بمبه‌ئی له‌ هێندوستان، سه‌روبه‌ندی سازکردنی فیلمه‌که‌، دژی ده‌رهێنه‌ره‌ ئینگلیزیه‌که‌ی ناڕه‌زاییه‌تیان ده‌ر‌بڕی، هه‌ر ئه‌و خه‌ڵکه‌ی کاتێ زانیان فیلمی میلیۆننێڕی زاغه‌نشین خه‌ڵاتی ئۆسکاری برده‌وه‌، ڕژانه‌ سه‌ر شه‌قامه‌کان‌، شایی‌و گۆڤه‌ندیان گێڕا. بیر له‌م دژبه‌رییه‌‌ ده‌که‌مه‌وه...
پێم وایه‌، کۆمه‌ڵگای کوردستان سارێژه‌ له‌و جۆره‌ چیرۆکانه‌، تژییه‌ له‌م جۆره‌ دژبه‌ریانه‌.
کچان، له‌ بیرتانه‌ ئه‌و ساتانه‌ی شه‌خشان، بوڕێن، هه‌لوکێن، چاوشارکێ‌و قه‌را قه‌را، تۆپی پێ‌و زۆر یاری دیکه‌مان ده‌کرد، له‌ پڕ هه‌موو شت حه‌رام کرا، ئێمه‌ له ‌یه‌کتر حه‌رام کراین، بووینه‌‌‌ بێگانه‌، جه‌سته‌مان بۆ یه‌کتر بوه‌ مۆته‌که‌، تۆ بویته‌ شه‌ره‌ف‌و که‌رامه‌تی بنه‌ماڵه‌‌و خێڵ‌، من بومه‌ پیاوی نێو پیاوان، ئه‌و کوڕه‌ی جاروبار له‌گه‌ڵ ئێوه‌ یاری ده‌کردو پیاوه‌تی خۆی به‌م چه‌شنه‌ پێشل ده‌کردو ده‌یبرده‌ ژێر پرسیار؟، ئه‌م بیرۆکه‌ له‌ هێلانه‌ی خۆی‌دا، ژنانی کرده‌‌ که‌رسته‌یه‌ک بۆ ڕابواردن‌و ته‌نانه‌ت شکانی پیاو، دیارده‌یه‌ک که‌ ته‌نانه‌ت له‌ نێوان سه‌لیم‌و جه‌ماڵ‌دا دێته‌ ئاراوه‌، ئه‌و دیارده‌ی تۆوی بێ به‌زه‌یی له‌ ناخی سه‌لیم‌دا ده‌چێنێ‌، هه‌مان ڕووداو قه‌ڵای پشوودرێژی جه‌ماڵ بۆ گه‌یشتن به‌ له‌تیکا پته‌وو له‌شکان نه‌هاتوو ده‌کات...
ئه‌وه‌ی لای ئێمه‌وه‌ ماوه‌ته‌وه‌ ته‌نیا نیگاکانه‌‌و یه‌ک دوو بیره‌وه‌ری له‌ت‌وکوت، ده‌ریایه‌کی به‌رین له‌ کاره‌ساتی فه‌رامۆش کراو، که‌نگێ‌و کێ دێت په‌رده‌یان له‌سه‌ر هه‌ڵبداته‌وه‌، کێ ئه‌و ئازایه‌تیه‌ وه‌به‌ر خۆی ده‌نێ ئه‌م هه‌موو چیرۆکه‌ کاره‌ساتباره‌ بنووسێته‌وه‌، باسی ئازاره‌کانی نه‌ته‌وه‌یه‌ک ته‌نیا سیاسه‌ت کردن نیه‌، ئه‌مڕۆ سیاسه‌تێک وێنه‌، دیمه‌ن‌و فیلمی له‌ پشت نه‌بێ، ناتوانێ سه‌رکه‌وتنێکی ئه‌وتۆ ده‌سته‌به‌ر بکات، بابه‌تێک که‌ مه‌ تاکوو ئێستا، بۆ ناساندنی پتری کێشه‌ ڕه‌واکانمان به‌ دونیا شێلگیرانه‌ بیرمان لێنه‌کردۆته‌وه‌...
نامهه‌وێت زۆر له‌سه‌ر ئه‌و فیلمه‌ بدوێم، به‌ڵام حه‌تمه‌ن هه‌وڵ بده‌ن بیبینن!

No comments: