مانگرتنی جه‌ماوه‌ریی خه‌ڵكی شاری مه‌ریوان گه‌یشته لوتكه
ئه‌مڕۆ هه‌ینی، رێکه‌وتی 16ی ڕه‌شه‌مه‌ی 1387ی هه‌تاوی، به‌رانبه‌ر به 6ی مارسی 2009ی زایینی، پاش پێنج رۆژ، مانگرتنی گشتیی خه‌ڵكی شاری مه‌ریوان گه‌یشته لوتكه‌و به سه‌رکه‌وتنه‌وه كۆتایی پێهات
له حاڵێكدا هه‌موو داموده‌زگاكانی شارستانی مه‌ریوان‌و پارێزگای كوردستان هه‌وڵیان بۆ ئه‌وه ده‌دا تاكوو ئه‌و بڕیاره‌ی خه‌ڵك که بریتی بوو له به‌شداری نه‌كردن له نوێژی هه‌ینیدا هه‌ڵبووه‌شێننه‌وه، جه‌ماوه‌ری خوڕاگروو ماف‌ویستی مه‌ریوان به‌شدارییان له نوێژی هه‌ینیدا نه‌كردو به مجۆره هه‌موو پیلانه‌كانی ده‌سه‌ڵاتدارانیان پووچه‌ڵكرده‌وه‌و پێیان سه‌لماندن ئه‌وان سوورن له‌سه‌ر داواكردنی مافه‌كانی خۆیان.
هه‌ر له‌و پێوه‌ندییه‌دا شه‌وی ڕابردوو به‌رپرسانی رژیم بریتی له پارێزگاریی كوردستان، ئیتلاعاتی پارێزگا، ئیتلاعاتی مه‌ریوان، فه‌رماندار، ئیمام جومعه‌و به‌شێكی‌تر له به‌رپرسانی شار ژماره‌یه‌ك له دووكاندارو بازاڕیه‌كانیان ڕاپێچی فه‌رمانداری كردو كۆبوونه‌وه‌یان پێكردن، له‌سه‌ر مانگرتنه‌كه‌ی خه‌ڵكی شاری مه‌ریوان قسه‌یان بۆ كردن ئه‌مه‌ش له‌و پێناوه‌دا تاكوو له رێگای ئه‌وانه‌وه خه‌ڵكی هان بده‌ن بۆ ئه‌وه‌ی به‌شداری له نوێژی هه‌ینیدا بكه‌ن، واز له مانگرتن بهێنن
به‌ڵام ئه‌و پیلانه‌ش بێ ئه‌نجام مایه‌وه‌و نه‌یتوانی له‌سه‌ر ئیمان‌و ئیراده‌ی جه‌ماوه‌ری ناڕازی شوێن دابنێن.
شایانی باسه، ئه‌مڕۆ ته‌واوی بازاڕو دووكانه‌كانی شار داخرابوون، هێزه ئیتلاعاتی‌و ئینتزامییه‌كان هه‌ر جۆره هاتووچۆیه‌كی خه‌ڵكیان خستبووه ژێر چاودێری خۆیانه‌وه‌و به جلوبه‌رگی كوردییه‌وه خۆیان خزاندبووه نێو جه‌ماوه‌ر، هه‌روه‌ها ده‌یان ماشینی گه‌شت له حاڵی سووڕانه‌وه‌دا بوون به كۆڵان و شه‌قامه‌كاندا.
هه‌روه‌ك چاوه‌ڕوان ده‌كرا له كاتی ده‌ستپێكرانی نوێژی هه‌ینیدا خه‌ڵكێك به‌دی نه‌ده‌كرا به مه‌به‌ستی نوێژكردن هاتبێته ده‌وروبه‌ری مزگه‌وتی جامیعه، فه‌رمانداری مه‌ریوان وه‌ك یه‌كه‌م وتاربێژ ده‌ستی به قسه كردو هه‌ر له سه‌ره‌تاوه ده‌ستی دایه پاساو هێنانه‌وه بۆ كاروكرده‌وه‌ی هێزه‌كانیان‌و رایگه‌یاند:
"ئه‌وان خه‌ریكن ئه‌رك‌و مه‌سئوولییه‌تی خۆیان به‌جێ دێنن".
كیانی وتی:"...ئێمه له‌م شارستانه‌دا ته‌نیا به‌ڕێوه‌به‌ری یاساكانی ده‌وڵه‌تین، ئه‌وه‌ی له سه‌ره‌وه پێمان ده‌سپێردرێت ئه‌نجامی ده‌ده‌ین، ئه‌و ئاماژه‌ی به‌وه‌دا ئه‌و یاسایانه به‌شێكن له ستراتیژیی نیزام له پێناو دابینكردنی ته‌ناهی نه‌ته‌وه‌ییداو له لایه‌ن شۆرای ئاسایشی نه‌ته‌وه‌ییه‌وه دیاری ده‌كرێن، ئێمه‌ش ده‌بێ به‌ڕێوه‌یان ببه‌ین بۆیه ناكرێت ئێوه داوا له ئێمه بكه‌ن كه وابكه‌ین‌و وا نه‌كه‌ین چوونكه ئه‌وه له ده‌ستی خۆماندا نییه...".
كیانی له درێژه‌ی قسه‌كانیدا باسی له‌وه كرد، گۆیا مه‌سئولان، به‌رپرسان‌و له‌وانه شه‌خسی خۆی ده‌نگی ناڕه‌زایه‌تی خه‌ڵكی شاری مه‌ریوانیان گه‌یاندووه‌ته به‌رپرسانی سه‌ره‌وه‌و ره‌زامه‌ندی ئه‌وانیان له‌سه‌ر هێندێك له‌و داخوازیانه وه‌رگرتووه كه بزیتین له:
كرانه‌وه‌ی دوو رێگا بۆهاتووچۆی كۆڵبه‌ران‌و كاسبكاران له‌سه‌ر سنوور
كۆتایی هاتن به بێ حورمه‌تی كردن به كاسبكاران‌و هه‌ڵسووكه‌وتی ناشیرین له‌گه‌ڵیاندا
كۆتایی هاتن به كوژرانی بارگیر، ئه‌سپ‌و چوارپێی كاسبكاران
ئازادكرانی خاڵی پشكنینی سه‌وڵاوا بۆ ئه‌و موسافرو میوانانه‌ی ده‌یانه‌وێ له شاری مه‌ریوانه‌وه كاڵا‌و شتومه‌ک بۆ شوێنه‌كانی‌تر ببه‌ن
كردنه‌وه‌ی كارگه‌و كارخانه‌و دابینكردنی هه‌لی كار بۆ خه‌ڵی شاری مه‌ریوان
هه‌رچه‌ند هیچ گارانتی‌و زه‌مانه‌تێك بۆ به‌ڕێوه‌چوونی ئه‌و به‌ڵێنانه‌ی جه‌نابی فه‌رماندا له ئارادا نییه، به‌ڵام وێده‌چێت مانگرتنی به‌رین‌و جه‌ماوه‌ریی خه‌ڵكی شاری مه‌ریوان ترس له دووپات بوونه‌وه‌ی وه‌ها مانگرتنێك، كاریگه‌رییه‌كی وای له‌سه‌ر به‌رپرسانی رژیم دانابێت كه مل بۆ ئیراده‌ی خه‌ڵكی ئه‌و شاره كه‌ج بكه‌ن، ئاوا به‌خێرایی وه‌ڵامی داخوازییه‌كانی ئه‌وان بده‌نه‌وه
.
شایانی ئاماژه‌یه پاش ته‌واو بوونی قسه‌كانی كیانی ئه‌و خه‌ڵكه‌ی له ده‌ورووبه‌ری مزگه‌وتی جامیعه كۆببوونه‌وه بڵاوه‌یان لێ كرد، جگه له چه‌ند كه‌سێكی به‌ستراوه به رێژیم كه‌س به‌شداریی له نوێژی عیبادی سیاسی ئه‌مڕۆی شاری مه‌ریواندا نه‌كرد.
به‌مجۆره خه‌ڵكی خۆڕاگری شاری مه‌ریوان پاش پینج رۆژ مانگرتنی گشتیی كۆتاییان به مانگرتن هێناو به دوژمنانی قین له دڵی گه‌لی كوردیان سه‌لماند هه‌ر كات ئیراده بكه‌ن ده‌توانن به یه‌كیه‌تیی‌و یه‌كگرتوویی خۆیان به‌سه‌ر هه‌موو که‌ندو کۆسپێکدا سه‌رکه‌ون.
سڵاو له جه‌ماوه‌ری خۆڕاگری مه‌ریوان.
سڵاو له یه‌کگرتووی به‌رین‌و هاوپشتی کورد په‌روه‌رانه‌ی خه‌ڵکی مه‌ریوان.
Friday, March 6, 2009
مانگرتنی جه‌ماوه‌ریی خه‌ڵكی شاری مه‌ریوان گه‌یشته لوتكه
Subscribe to:
Post Comments (Atom)
No comments:
Post a Comment