كۆنگره‌ی 13ی حیزب لوتكه‌ی ئاڵوگۆڕه جیددییه‌كان
[به‌شی حه‌وته‌م]

باسمان له‌‌وه ‌كرد كه پرۆسه‌ی هه‌ڵبژاردن له حیزبی دێموكراتی كوردستانی ئێراندا پرۆسه‌یه‌كی به ته‌واوه‌تی دیموكراتیكه و مێژووی ژیانی سیاسی ئه‌م حیزبه و ئه‌نجامی كۆنفرانس و كۆنگره و هه‌ڵبژاردنی ڕێبه‌رایه‌تی حیزب له ڕێگای ده‌نگی سه‌ربه‌خۆی ئه‌ندامانی حیزبه‌وه، ئه‌و ڕاستییه به باشی نیشان ده‌دات. ئه‌م پرسه دیموكراتیكانه وه‌ها له‌نێو ڕیزه‌كانی حیزبدا ڕه‌گ و ڕیشه‌یان داكوتاوه كه گوێ نه‌دان پێیان ده‌توانێ كاره‌سارتخولقێن بێت.

ئێمه له مێژووی حیزبدا به كردوه‌وه به‌شێك له‌م ڕووداوه ڕه‌شانه‌مان به چاوی خۆمان دیتووه. هه‌رچه‌نده هه‌موو دیارده‌كانی پاش كاره‌ساته‌كان و ڕووداوه تاڵه‌كانیش به ڕوونی ده‌ریانخستووه كه هه‌نگاوه نادیموكراتیكه‌كانیش ته‌نها به نیازی گه‌شه‌پێدان و بووژانه‌وه‌ی حیزب و گروپه‌كاندان و بۆ كاروباری حیزب بووه له ڕووی پراكتیكه‌وه.

ڕه‌نگه زۆر كه‌س گه‌شه‌سه‌ندنی هه‌‌رچی پتری دیموكراسی و قووڵتربوونه‌وه‌ی پرسه دیموكراتیكه‌كان بۆ خه‌باتی سه‌خت و دژواری حیزب زۆر به پێویست نه‌زانن. ته‌نانه‌ت ئه‌م پرسه دیموكراتیكانه بۆ خه‌باتی حه‌قخوازانه‌ی ئێمه كه ڕێگای هه‌ڵسووڕانی به‌ئاشكرای له‌نێو جه‌ماوه‌ری پانوبه‌رینی كۆمه‌ڵگه‌ی خۆیدا نییه، له بڕێك شوێن و قۆناخدا به زیانباریش لێكبده‌نه‌وه. ڕه‌نگه ئه‌م بابه‌ته‌ش زۆر ناواقعبینانه نه‌بێت، ده‌كرێت قسه‌ی له‌سه‌ر بكرێت و به دیالۆگ باشترین میكانیزم بۆ چاره‌سه‌ركردنی بدۆزرێته‌وه. چاره‌‌سه‌رییه‌ك كه به‌رهه‌می دیالۆگ بێت، زه‌حمه‌ته به خالێكی نادیموكراتیك پێناسه بكرێت.

لێره‌دا خالێك كه نابێت له بیرمان بچێت ئه‌وه‌ییه كه ژیان و هه‌ڵسوكه‌وتی ئه‌مڕۆمان پێوه‌ندی ڕاسته‌وخۆی به سۆزی كۆمه‌ڵگه‌وه هه‌یه. بابه‌تێك كه ئه‌زموونی ده‌سه‌ڵاتی ده‌وروبه‌رمان پێمان ده‌بێژێت چه‌نده هه‌ستیار و ناسكه. گه‌شه‌پێدانی دیموكراسی له ژیانی سیاسی ئه‌مڕۆماندا، گوێڕایه‌ڵی سبه‌ی ئێمه‌ی له ئاست داخوازیی كۆمه‌ڵانی هه‌راوی خه‌ڵكدا لێده‌كه‌وێته‌وه. بێگومان ئه‌م دیارده پاراستنی ئیعتیبار و پرستیژی ئێمه لای جه‌ماوه‌ری خه‌ڵك و دۆستانمان هه‌روا به‌رز و قایم ڕاده‌گرێت.

سه‌ره‌ڕای هه‌موو ئه‌م خاڵانه‌، نابێت له بیرمان بچێت كه حیزب وه‌ها ئاوێته‌ی دیموكراسی بووه كه له ژیانی تاراوگه‌نشینیشدا هه‌نگاوی گه‌وره‌ی دیموكراتیك ده‌هاوێژرێت، هاتنه ئارای ڕووداوی سیاسی جۆراوجۆر، له چه‌شنی دوو ده‌وره سكرتێری له دوو كۆنگره‌ی به‌دوایی یه‌كدا و خانه‌نشینكردنی ئه‌ندامانی به‌ساڵداچوو، له كۆنگره‌ی 13ی حیزبدا، نیشانه‌ی ئه‌و ڕاستیانه‌ن.

بێ خۆهه‌ڵكێشان و ده‌مارگرژی، حیزب له‌ پێوه‌ندی له‌گه‌ڵ هێنانه مه‌یدان و پراكتیزه‌كردنی پرۆسه‌ی دیموكراسی و چه‌مكه دیموكراتیكه‌كان، له ئاستی هێزه سه‌راسه‌رییه ئێرانی‌ و كوردستانییه‌كا‌‌ن، هه‌میشه له پێش بووه.

ئاشكرایه كه به‌ربڵاوی دیموكراسی نێوخۆییمان و ئاوه‌ڵابوونی كه‌شی ڕه‌خنه و ڕه‌خنه له خۆگرتن له سه‌ره‌وه بۆ خوارێ و له خواره‌وه بۆ سه‌رێ، هه‌میشه له حیزبی ئێمه‌دا بواری حزووری سه‌رجه‌م ئه‌ندامانی بۆ به‌شداریكردن له بڕیاردان به‌گشتی و پرۆسه‌ چاره‌نووس سازه‌كاندا به‌تایبه‌تی، ڕه‌خساندووه‌. ئه‌م مه‌یدانه هه‌میشه خاڵی جیاوازی جێگای شانازایمان له‌گه‌ڵ ڕێكخراوه‌كانی دیكه‌دا بووه.

ڕووی ده‌ره‌وه‌ی ئه‌م مه‌سه‌له هه‌موو كات هۆكارێكی گرینگ بووه بۆ به‌ره‌وژووربردنی قه‌در و قیمه‌تی سیاسی حیزب. له باری نێوخۆیشه‌وه، ئاستی هه‌ستكردن به به‌رپرسایه‌تی، دڵسۆزی، وه‌فاداری و به‌ره‌وژوورچوونی خۆشه‌ویستی حیزبی لێكه‌وتۆته‌وه.

كه وایه هێنانه‌مه‌یدانی ته‌نها دوو ده‌وره سكرتێری له دوو كۆنگره‌ی به‌دوای یه‌كدا خزمه‌ت به‌م كه‌شه نێوخۆیه‌مان ده‌كات و هاوكات ئێمه له به‌رانبه‌ر ڕێكخراوه‌كانی دۆستماندا سه‌روگه‌ردنێك به‌رزتر به دیار ده‌خات. كه‌وابوو ده‌بێت له ئاست قسه‌ی نه‌یارانی سیاسی و دوژمنانی سوێندخواردووی حیزبدا هۆشیار بین و به ده‌نگی به‌رز ڕابگه‌یه‌نین كه ئه‌م بابه‌ته به نه‌ریتشكێنیكی گه‌وره ده‌زانین و شانازی پێوه‌ ده‌كه‌ین، گه‌شه‌ی پێده‌ده‌ین و به‌ره‌وپێشی ده‌به‌یین.

حاشا له‌وه ناكرێت كه بۆ هێنانه به‌رهه‌می ئه‌م چه‌مكه دیموكراتیكه نوێیه پێویسته كۆمه‌ڵێك بواری كاری به‌كردوه بخوڵقێنین و به ئاشكرا و دڵسۆزانه كاری بۆ بكه‌ین. ئه‌گه‌ر ئێمه بكارین دیالۆگێكی ئاشكرا به مه‌به‌ستی به‌ربڵاوتركردنی هه‌رچی پتری شه‌فافیه‌ت بهێنینه ئاراوه‌، بێگومان ده‌توانین له‌سه‌ر بنه‌مای لێك ‌نه‌چوونه‌كانمان پێكه‌وه كار بكه‌ین و حیزب بۆ پێشه‌وه به‌رین.

ئێمه بۆ گه‌شه‌پێدان به‌م پرۆسه، ئه‌زموونی كۆنگره‌ی 10ی حیزبمان له‌به‌رده‌ست دایه. دیاره كه له خاڵی سفره‌وه ده‌ستپێناكه‌ین. به باوه‌ڕی من ئێستا قۆناخی چه‌سپاندنی هه‌رچی پتری نهادینه‌كردنی مافی تاكه‌كه‌س به ڕه‌نگوبۆنی جیاوازه‌وه له حیزبدا ئاماده‌یه. تاكێك كه باس له گه‌ڵاڵه و پرۆژه‌كانی خۆی ده‌كات، بێ ئه‌وه‌ی مووچڕك به له‌شیدا بێت. تاكێك كه ئه‌ركه‌كانی خۆی ده‌ناسێت و بۆ جێبه‌جێكردنی ئه‌ركه پێئه‌سپێردراوه‌كانی به‌دڵه‌وه هه‌نگاو ده‌نێت و له خێر و شه‌ڕی حیزبدا خۆی به به‌شدار ده‌زانێت. لێره‌دایه كه پرۆسه‌ی پێكه‌وه كاركردن و هه‌ڵكردن ده‌بووژێته‌وه و هه‌ستكردن به به‌رپرسایه‌تی له ئاست چاره‌نووسی حیزبدا هه‌ڵده‌كشێت.

درێژه‌ی هه‌یه...

false rahim 2005-01-31T13:15:42-08:00 2005-01-31T22:00:42Z 2005-01-31T22:00:42Z tag:blogger.com,1999:blog-8929987.post-110720884240918865
ره‌نگ چه‌رموو گیان!

له بیرمه، كه تۆ ده‌رنه‌كه‌وتبوویت،خه‌م خه‌ریك بوو هه‌موو بیروو هۆش و مێشكمی‌ ده‌ته‌نی و، ته‌نگی پێهه‌ڵده‌چنیم. ژیان لام نامۆو نامۆو تر ده‌بوو. بێ هیوایی باڵی به‌سه‌ر ئاسمانی خه‌ونه ره‌نگینه‌كانما ده‌كێشا.ژیان هه‌ر ده‌هاتوو بێماناتر ده‌‌بوو. تروسكایم به‌دی نه‌ده‌كرد و، دڵم به هیچ خۆش نه‌ده‌‌بوو. ژیان ره‌نگی قه‌ترانی به‌ خۆوه گرتبوو، ره‌نگه‌كان بێ مانا ببوون و، ده‌نگه‌كان هه‌ستێكیان بونیاد نه‌ده‌نا. ئای كه ژیان هه‌تا بێژیت بێ مانا بوو. بێ وازی و خۆ خواردنه‌وه به‌هێزترین لایه‌نی گوزه‌رانی ڕۆژانه‌ی پێك دێنا.

ره‌نگ چه‌رموو گیان!
تۆ به‌رهه‌می ئه‌م ساته پڕ ژانانه بوویت ، هه‌ر بۆ یه‌كه‌م جار، ده‌نگت شنه‌باێكی ئارام و هێدی و له سه‌ره خۆ بوو، وه‌كوو ئاوێكی ئارام و سارد و سووك كه ده‌رژێته نێو ده‌روونی رێبوارێكی ماندوو ته‌وێڵ ئاره‌قاوی و ئارامی پێ ده‌بخشێ و ماندوویی له له‌شی داهێزاوی ده‌رده‌كات، ئاوا حه‌ساندمیه‌‌وه‌. ئارامی و هێدی و هێور بوونت منی سه‌رسام ‌كرد و دایم بیرم له و هه‌موو مێهره‌بانی‌‌یه ده‌‌كرده‌وه. باوه‌ر بكه، زۆر جاران ده‌ستم له به‌ر ئه‌ژنۆكانم هه‌ڵده‌پێكان و، ده‌بیر ڕاده‌چووم، مێهره‌بانی‌یه‌كانت، قسه‌كانت، خه‌نده‌كانت، هیواو خه‌ونه‌كانت، سه‌رسامیان ده‌كردم و تووشی بیركردنه‌وه‌ێكی قووڵیان ده‌كردم.


ره‌نگ چه‌رموو گیان!
له بیرمه كه هه‌میشه باسی خۆرت ده‌كرد و، رووناكایت به ژیان ده‌بخشی و، منی بێزار له گیانی خۆمت بۆ هاتنی سۆزی، كه حه‌سانه‌وه‌‌ی تێدا مسۆگه‌ره هانده‌دا. ڕه‌فتارت، كردارت، گوفتارت له‌م ماوه‌دا وایان لێكردووم كه له كاتی بێزراوی و خه‌مه‌كاندا پتر بیر له تۆ بكه‌وه. ئه‌زانیت؟ تۆ به‌رهه‌می رۆژگاره بێ هیواكانیت. تۆ گزنگی شه‌و‌ه زه‌نگه‌كانیت. ئه‌و شه‌وانه‌ی كه بۆنی قاقره‌ستانیان ده‌دا و بۆنی مه‌رگ و بێ ده‌نگی كاسی ده‌كردین، ئا! تۆ له‌م زه‌مه‌نه تاقه‌ت پڕووكێنه‌دا بویته مه‌كۆی هیواو بووژانه‌وه... ئه‌مانه وایان كرد كه تۆ هه‌میشه لای من تابلۆی ره‌نگه‌كانم بیت ، تابلۆێك كه من حه‌زه‌كانی خۆم و نیگاره‌كانی خۆمی تێدا ده‌بینمه‌وه.

ره‌نگ چه‌رموو گیان!
چاوه‌ ڕه‌ش‌ و پڕ هیواكانت هه‌میشه موژده، به‌ڵێ موژده‌ی من و تۆیان بۆ هیوادار بوون به له دایك بوونه‌وه‌ی ژیان و بارینی باران و له ئامێز گرتنه‌وه‌ی باران بۆ هیوادار بوونه‌وه به ژیان ، ڕژانده جه‌سته‌مه‌وه. تۆ له‌‌م رۆژگاره ڕه‌ش و تووشانه‌دا تۆوی هیوات چاند. دڵنیابه هه‌میشه بۆ من گرینگیت. گرینگیت وه‌كوو نان، وه‌كوو ئازادی ، وه‌كوو ژیان. تۆ خۆت مانای بوونیت. له بیرت نه‌چێت، ئێمه هه‌میشه پێكه‌وه ده‌مێنینه‌وه تاكوو پێكه‌وه ماچی گۆنای خۆره‌تاو بكه‌ین. ئێمه رێگا سه‌خت و دارستانه چڕ‌‌ه‌كان پێكه‌وه ده‌بڕیین تاكوو ده‌گینه رووناكی. پێكه‌وه ، به‌ڵێ پێكه‌وه حه‌قیقه‌ت ده‌بینینه‌وه و ئارامی له باوه‌ش ده‌گرین و له به‌رده‌می به‌خته‌وه‌ری‌دا ئاوێته ده‌بین و ڕاسته قینه‌ترین مانا به ژیان ده‌بخشین.