رۆژنامەوان جەماڵ پوورکەریم لە مەرگ گەڕایەوەو بە پەلە پڕووزە قوتاری بو.

رەحیم رەشیدی

شه‌وی ١٥ی مارسی ٢٠١٢ی زایینی، رۆژنامه‌وان جه‌ماڵ پوورکه‌ریم پاش ئه‌وه‌ی کاتژمیر٢٢:٣٠ شەو، به‌ مه‌به‌ستی گه‌رانه‌وه‌ی له‌ کوردستانی عێراقه‌وه‌ به‌ره‌و فه‌رانسه‌ له‌ فرۆکه‌خانه‌ی هه‌ولێر به‌ره‌و لوبنان له‌ ریگه‌دا بو، کاتژمیر ١:٢٠ شه‌وی ١٦ی مارس له‌ کاتی گۆڕینی فرۆکەدا، له‌ لایه‌ن پۆلیسی فرۆکه‌ خانه‌ی "ره‌فیق حه‌ریری" له‌ به‌یرووت گرفتی بۆ ساز کراوە. ناوبراو بۆ ماوه‌ی ٢ کاتژمێر ده‌ستبه‌سه‌رو له‌ ژیر لێکۆڵینه‌وه‌دا بوە، سه‌رجه‌م به‌ڵگه‌نامه‌، کارت‌و پاسپۆرته‌که‌ی له‌ لایه‌ن پۆلیسه‌وه‌ ده‌ستی به‌ سه‌ردا گیراوەو ته‌نانه‌ت قفلی سه‌ر ئه‌و چه‌مه‌دانه‌ی که‌ کەل‌و پەلی ناوبراوی‌دا تێدا بوە به‌ر له‌وه‌ی راسته‌وخۆ بگاته‌وه‌ پاریس شکێندراوەو بە بێ ئاگاداری خۆی پشکێندراوە.

ئاشکرایە کە ویستویانە بزانن ناوبراو لە چ ته‌له‌فزیۆنێک کار ده‌کات‌و رۆژنامەوانی چ ڕاگەیاندنێکە، یان بۆ له‌سه‌ر پاسپۆرته‌که‌ی نوسراوه‌ کە ئێران ته‌نیا وڵاتێکە کە ناتوانێ سەفەری بۆ بکات‌، یان بۆ پەنابەری سیاسییەو ئەمە لە پاسپۆرتەکەی‌دا نوسراوە، لەبەر چی  پاسپۆرتی ئێرانی پێ نییه‌ لە حاڵێک‌دا کە ئەو ئیرانییەو و ده‌یان پرسیاری دیکه‌ی لەم بابەتە...‌
پاش ئەم رووداوانە رۆژنامەوان پوورکەریم لە دەرفەتێك‌داو لە رێگای تەلەفوونەوە بەرێوەبەرایەتی تیشک تی‌ڤی‌و نوێنه‌رایه‌تی "حدکا" له‌ ده‌ره‌وه‌ی وڵات لە دۆخی پڕ لە مەترسی خۆی ئاگادار دەکاتەوە‌، ئینجا دەفتەری پاریس بە هاوهەنگاوی لەگەڵ نوێنه‌رایه‌تی هه‌ولێری حیزبی دێموکراتی کوردستان، بە وردی‌‌و بە خێرایی پێوشوێنی بابەتەکە دەگرن‌‌و شێلگیرانە هەوڵی رزگاری کردنی ناوبراو دەدەن‌و لەم پێوەندییەدا چەن کەسایەتی‌و ناوەندی جیهانی‌ لە دۆخی ئەم رۆژنامەوانە ئاگادار دەکەنەوە.

پاش تێکۆشانی بەردەوامی لایەنە پێوەندیدارەکان، هاوکات بە هۆی ئەوەی کە ناوی "جه‌مال پوورکه‌ریم" له‌ سه‌ر به‌ڵگه‌کان‌و پاسپۆرتی ناوبراوە نەبوە، چوونکە بەرێز "جەماڵ پوورکەریم" لەسەر پێناسەکانی "حەسەن پوور کەریم" ناوەکەیەتی، پاش ئەوە کە فرۆکە بۆ ماوەیەک وەدوا دەکەوێ، رزگاری دەبێت‌و دەگەرێتەوە فەرانسە‌و پۆلیسی فرۆکەخانە ناچار دەبن کە کارتی رۆژنامەوانی‌و بەڵگەکانی دیکەی پێبدەنەوە.

 مەبەست لە باس کردنی ئەم باسە ئەوەیە کە هاووڵاتیانی کوردی ئێرانی لەوە ئاگادار بن کە هاتوچۆ بۆ کوردستانی عێراق لە رێگای لوبنانەوە، تەنیا لەبەر ئەوەی کە هەرزانتر تەواو دەبێت، رەنگە باش نەبێت‌و ئەزموونی ئەوەی بەسەر "پورکەریم"دا هاتوە ئەوە نیشان دەدات کە سەفەر بۆ کوردستان بە لوبنان‌دا پڕ مەترسییە.