لە دەڤەری واشینگتۆن، جێژنی نەتەوەیی نەورۆز بە شکۆیەکی مەزنەوە بەڕێوە چو.

رۆژی شەممە رێکەوتی ٢٤ی مارسی ٢٠١٢ی زایینی بە بەشداری سەدان کەس لە کوردستانیانی نیشتەجێی ئامریکا، جێژنی نەتەوەیی نەورۆز بە جۆش‌و خرۆشێکی مەزنەوە بەرێوە چوو.
ئەو جێژنە نەتەوەیە، کاتژمێر ٧:٣٠ی سەر لە ئێوارێ، بە سرودی نەتەوایەتی ئەی رەقیب دەستی پێکردو پاشان خولەکێک بێدەنگی بۆ رێزگرتن لە گیانی پاکی شەهیدانی کوردو کوردستان ڕاگەیەندرا.
ئینجا پەیامی رەوەندی کورد لە ئامریکا بە زمانەکانی کوردی‌و ئینگلیزی لە لایەن رەحیم رەشیدی‌و بەهار گاودانی پێشکەش کرا.
شیاوی ئاماژەیە کە بەشداری کوردی هەر چوار پارچەی کوردستان‌و کۆمەڵێک کەسایەتی‌و خەڵکی بیانی لەو جێژنەدا نەتەوەییەدا بەرچاو بو.
دواتر هونەرمەندان جیهان‌و کوردستان لەگەڵ رەوەند‌و مەریوان هەڵەبجەیی تاکوو درەنگانی شەو جێژنەکەیان ڕازاندەوەو کاتژمێر ١٢:٠٠ی نیوە شەو ئەو رێورەسمە رازاوەیە لە نێو ڕەشبەڵەک‌و گۆڤەندنی بەشداران‌دا بە خۆشییەوە کۆتایی پێهات.

ئەوە وتارەی خوارەوە دەقی پەیامی رەوندی کورد لە ئامریکایە کە لە لایەن رەحیم رەشیدی پێشکەش کرا.

وێنە: رەحیم رەشیدی لە کاتی پێشکەش کردنی پەیامی نەورۆزدا

به‌ بۆنه‌ی هاتنی نه‌ورۆزی نیشتمانی‌و وه‌رزی به‌هاره‌وه‌ لە لایەن کۆمیته‌ی به‌رێوه‌به‌ری رێورەسمی نه‌ورۆز، پیرۆزبایه‌کی گه‌رم‌و پڕ له‌ خۆشی‌و شادومانیتان پێشکه‌ش ده‌که‌ین.

پیرۆزبایی له‌ ئێوه‌ی ڕه‌وه‌ندی کوردی له‌ ئه‌مریکاو له‌ گشت کوردێکی ئه‌م جیهانه‌، به‌ باکورو باشورو خۆرهه‌ڵات‌و خۆرئاوای نیشتیمانەوە، ده‌که‌ین.

پێویسته‌ کە نەورۆز بکه‌ین، به‌ نه‌ورۆزی ئاشته‌وای ریزه‌کانمان‌و ئومێدو ژیان‌و خۆ نوێکردنه‌وه‌، هه‌ر له ‌کۆنه‌وه‌ نه‌ورۆز هه‌ستی نه‌ته‌وایه‌تیمان پته‌وتر ده‌کات‌و شه‌وقێکی به‌ گڕ ده‌به‌خشێته‌ ژیانی گه‌له‌که‌مان.

هیوا خوازین ساڵی نوێ، ساڵی وەدیهاتنی ئاوات‌و گەیشتن بە ئامانجە بەرزەکانی سەرجەم کوردو کوردستان بێت.

وێنە: دیمەنێک لە بەشدارانی ئاهەنگی نەورۆز لە دەڤەری واشینگتۆن

نه‌ورۆز له‌ مێژووی نه‌ته‌وه‌کەمان‌دا؛ جێگاو شوێنی تایبەت بە خۆی هەیە. له‌ بواری سروشتیشه‌وه‌ نه‌ورۆز سه‌ره‌تای ساڵ‌و ده‌ستپێکی به‌هارو بووژانه‌وه‌یه‌، ژیانەوەی کانیاوەکانە کە بە رووخساری چیاکان‌دا دێنە خوارو دیمەنێکی دڵرفێن بە هەموو قوژبنێکی نیشتمانی دەلال‌ دەبەخشن‌، هەر لەو دەمە‌دا گیاو گوڵ له‌ دڵی خاك‌‌ سەر دەردێنن‌‌و لە ئاکامدا بەژن‌و باڵای هەموو دەڤەرو مەڵبەندێك بە گوڵ دەڕازێتەوە.

نەورۆز، سەرەتایەکە کە سروشت بە بەرگی بوژانەوەوە بە روومان‌دا پێدەکەنێ‌، خۆر تیشکی زێڕینی خۆی به‌سه‌ر شان‌و پیلی ده‌شت‌و ده‌ردا شۆر ده‌کاته‌وه‌و پرچی سروشت شانە دەکات‌و لە هەموو لایەکەوە ئەوینداران ڕوو لە دەشت‌ودەر دەکەن‌و بۆ سەفا ئاوێتەی سروشت‌ دەبن‌و تابڵۆیەکی رەنگین‌و ڕازاوە دەنەخشێنن.

نەورۆز بۆ ئێمه‌ی کورد، جێژنێکی نه‌ته‌وه‌یی‌و نیشتمانییه‌، هێمای به‌رخۆدان‌و کۆڵنەدان بۆ رزگاری‌و خه‌باتی بێوچانە بۆ کۆتایی ‌هێنان به‌ ژێر ده‌سته‌یی‌و چه‌وسانه‌وه‌.

نەتەوەی دابەش کراوی کورد، لە هەموو بەشەکانی کوردستان، بە گەرم‌و گوڕی‌ بەرەو پیلی نەورۆز دەچێ‌و لە هەموو جێگایەك بە گرینگیەکی زۆرەوە ئەم یادە بەرزو پیرۆز ڕادەگرێت.

لە کوردستان، گڕی ئاگری بە تین‌و تاوی نەورۆز، وێرای بەخشینی گەرما‌و ڕووناکایی، هۆکارو هاندەری درێژەدان بە خەبات‌و تێکۆشان دژی زۆرداری‌و دیکتاتۆری بووه‌و دەبێ.

نەورۆز بۆ ئێمە دەروازەی پێك گەیشتنەوەمانە کە بە دەر لە ویست‌و ئیرادەی خۆمان بە سیاسەتی زۆردارانەو بە چاو چنۆکی، دابەشیان کردوویین. ئەم پارچە پارچە کردنە، نەیتوانیوە ویستەکانمان‌، هەست‌و دڵ‌و خواستەکانمان دابەش‌و پارچە پارچە بکات. هەر ئەم هەوڵ‌و تێکۆشانە بێ وچانەشە کە کوردی لە بەرانبەر ئەو هەموو زەبرو زەنگەدا قورسەدا راگرتوە.

ڕەوندی کورد لە ئامریکا، کە زۆربەمان بە هۆی شەڕو شۆرو سیاسەتی قڕ کردن‌و کوشتاری داگیرکەرانەوە لە تاراوگە گیرساوینەتەوە، بە بایەخەوە ئاوڕ لە ئاڵوگۆڕەکانی ئەو وڵاتانە دەدەینەوە کە کوردستانیان بەسەردا دابەش کراوە.

ئەو راستییە بە باشی تێدەگەین‌ کە لەگەڵ هەموو پێشکەوتن‌و بەرەوپێش چوونێک کە لە باشوری کوردستان‌دا هاتۆتە ئاراوە، کە سەرەڕای کەم‌و کورتییەکان‌و گرفته‌کان، گه‌شه‌‌و نمای بە خۆوە بینیوە، بەڵام دادپەروەری‌و یەکسانی پترو چڕو پڕتر، کە لە توخمە سەرەکییەکانی خەباتی رزگاریخوازانەی کورد بوە، پێویستییەکی حاشا هەڵنەگرەو ئاکامەکەی سەقامگیری‌و کرانەوەی زۆرتری کۆمەڵگای کوردستانە.

به‌ هیوای رزگار بوونی پا‌رچه‌کانی تری کوردستان له‌ ده‌ست دووژمنانی کوردو کوردستان.

ئێمە، زۆر به‌ تووندی ئیدانه‌ی ئه‌و شاڵاوه‌ نا مرۆڤایه‌تیانه‌ ده‌که‌ین که‌ دەسەڵاتدارانی تورکیە دەیکەنە‌ سه‌ر کورده‌کانی باکوورو بڕیاری قەدەغە کردنی جەژنی نەورۆزیان داوەو لە ئاکامی ئەم نارەوایەتەش‌داو لە روو بە روو بونەوەی نێوان هاوڵاتیان‌و هێزه‌کانی تورکیەدا دەیان کەس بریندار بون.

بە گوێرەی سەرچاوەکانی مافی مرۆڤ‌و راگەیەنەرە گشتییەکان، لە ماوەی چوار رۆژی ڕابردوودا، حکومەتی تورکیە زیاتر له‌ ٧٠٠ کوردی دەستگیر کردوەو هاوکات لە مانگی ئاداردا، پتر لە ١٠٠٠ کەس دەست بەسەر کراوان.

به‌ ناوی ڕه‌وندی کوردی له‌ ئه‌مریکا، سڵاوی خۆراگری‌و سه‌ربه‌رزیان بۆ ده‌نێرین‌و هیوای چاکبوونه‌وه‌ی هەرچی زوورتری برینداره‌کان بە ئاوات ده‌خوازین.

ڕەوەندی کوردی، بە شانازی‌و خۆشحاڵییەوە، لە پەرە سەندنی هەستی نەتەوایەتی‌و یه‌ك ڕیزی ‌لە نێو کوردەکانی نیشتەجێی ئامریکا دەڕوانێ‌و ئەمەش ده‌سکه‌وتێکی به‌رزو پیرۆزه‌و بە بەرپرسایەتییەوە بۆ گەشە سه‌ندنی ئه‌و یه‌کریزییه‌ هاوخه‌باتین‌و تێدەکۆشیین‌و کۆڵ نادەین، دەبێ لە پێناوی تۆخ کردنەوەی تەبایی‌‌و یەکیەتیی نەتەوەیی‌دا پتر تێ بکۆشین‌و باوەڕ بەو ڕاستییە بهێنیین کە ئەمە تەنیا رێگای دورست‌و روونه‌ بۆ سەرکەوتنی نەتەوەکەمان.

وێنە: لە راستەوە: موحەممەد گرژاڵی، عەلی جەوانمەردی، رەحیم‌و تاهیر رەشیدی

خۆشه‌ویستان له‌ کۆتایی‌دا ده‌لێین، با پێکەوە گێرانی ئاهەنگی جه‌ژنی نەتەوەیی نه‌ورۆز له‌م شه‌وه‌ پیرۆزه‌وه‌، بە خۆشی‌و شادییەوە درگای دڵمان بە رووی نوێ بوونه‌وه‌ی سه‌ری ساڵی کورده‌واری‌دا بخه‌ینه‌ سه‌ر پشت‌و به‌ بزەوە بەخێر هاتنی ورزی به‌هاری دڵگیر بکه‌ین.

بژی کوردو کوردستان

نه‌ورۆزتان پیرۆزو هه‌موو رۆژیکتان جێژن‌و شادی بێت.

ڕه‌وه‌ندی کوردی له‌ ئامریکا، نه‌ورۆزی ٢٠١٢ی زایینی